Il libri di Sofonie
Stant al titul dal so libri, Sofonie al à profetât sot di Gjosie (640-609). I siei atacs cuintri des modis forestis (1,8) e la religjon dai dius fals (1,4-5) e lis sôs cridadis cuintri dai ministris (1,8) biel che al tâs sul re, a fasin scrupulâ che al vedi profetât fra il 640 e il 630, cuant che il re al jere inmò sot pupîl. O sin duncje alc prime dal inizi dal ministeri di Gjeremie.
Il librut si divît in cuatri sezions: la zornade dal Signôr (1,1-2,3); cuintri dai popui (2,4-15); cuintri di Gjerusalem (3,1-8); promessis (3,9-20).
Il struc dal mes di Sofonie al è sul stamp di Amos: e sta rivant la zornade dal costret, un flagjel che al plombarà sun dutis lis gjernaziis, comprendût Gjude.
La colpe di Gjude e je di ordin religjôs e morâl e e partìs de sô grande supierbie e dal so istint di ribelion. Sofonie al à dal pecjât une nozion profonde a pâr di Gjeremie: si trate di une ofese personâl al Diu vivent. Il cjastic al è un avîs, magari cussì no, inutil; par chel la promesse e rivuardarà dome un “rest” umil e sclet.
La vore di chest profete no à vude masse furtune. Il GT le ripuarte une sole volte (Mt 13,41). Ma la descrizion crude de zornade dal Signôr e à ispirade chê di Gjoel e, inte ete cristiane di Mieç, e à furnît il cjaveç dal Dies irae, cjantât fint a cualchi an indaûr in ducj i nestris funerâi.