Il libri di Zacarie
Di famee sacerdotâl, Zacarie al à scomençât il so ministeri profetic tal novembar dal 520 p.d.C., pôc dopo di Agjeu. Ducj i doi a àn la preocupazion de ricostruzion dal templi. A chest a smicjin lis vot visions (cc. 1-6) e lis sentencis (cc. 7-8) de prime part. La seconde (cc. 9-14) e ripuarte profeziis messianichis anonimis e cence date, che forsit a ripiin un document plui antîc (viers il 721 i cc. 9-11) e rielaborât dopo dal esili. I esperts a fevelin dai ultins agns dal sec. IV p.d.C., dopo de concuiste di Alessandri il grant.
Pensâ a un sôl autôr nol è propit facil. Di fat, come tal câs di Isaie, and è di chei che a fevelin di un Deutero-Zacarie e di un Tierç-Zacarie.
A diference di Agjeu, che si preocupe plui de ricostruzion materiâl dal templi, Zacarie al bat fuart su la restaurazion nazionâl e su lis esigjencis di moralitât e di puritât, che a coventin come, se no plui, de part materiâl. Ancje la escatologjie, o spiete dai ultins timps, i timps dal Messie, e je plui marcade. Inte ete messianiche il sacerdozi al sarà rivalutât ma in colegament cu la regalitât esercitade dal “butul” (3,8) o “germoi”.
Cussì Zacarie al torne a inviâ la vecje idee dal messianisim regâl, cun funzion prevalentementri sacerdotâl. O sin su la linie des preocupazions sacerdotâls di Ezechiel.
Dute cheste ricjece di temis, ancje se scompagnâts fra di lôr, a fasin dal libri une des anticipazions plui vivis de figure dal Crist. Nol è un câs che il GT si rifâs dispès a chest profete.
Al è, tal mac dai profetis minôrs, il libri plui lunc.