Notiziis e avîs

Memorie di pre Checo

26 di Novembar 2021

Pre Checo Placerean al è stât un om di ponte te valorizazion de nestre lenghe e culture, vôs vivarose pe difese lucide, passionade e sigure dal dirit a un progjet di svilup culturâl, economic e sociâl autonim che e je la fonde di ogni democrazie gjenuine. Une batae pôc capide e mancul ancjemò gratificade, ma che cul passâ dal timp, in cheste clime di continue e gjeralizade omologazion, e cuiste simpri plui valôr profetic.
Al è dovê, partant, di ricuardâlu a 101 agns de sô nassite (30.11.1920) e a 35 agns de sô muart (18.11.1985).
Glesie Furlane in acuardi cul Istitût ladin furlan “pre Checo Placerean” e invide ducj i furlans:
– Vinars ai 26 di Novembar a 6 sore sere te glesie di Sante Eline a Montenars par ricuardâlu cuntune messe e cun leturis di tescj di pre Checo. Prin di messe une preiere su la sô tombe, tal cimitieri.
– e ai 30 di Novembar a lis 8 e mieze sore sere a Glemone tal “Cinema Teatro Sociale“ al sarà proietât il docufilm “Predis, la nazione negata” di Massimo Garlatti Costa.