Olmis di Diu - A. Beline

Mi plasarès che pre Renzo Micelli dal soreli de eternitât al vedi podût contemplâ chê prucission lungje lungje di oms, di feminis, di zoventût e di canae, che sot di un soreli dolç di otubar lu à compagnât cul afiet sclet e profont dai cjargnei a polsâ in etât relativamentri verde e dopo di un calvari che al veve segnât pioris e pastôr. Forsit une antecipazion di chê fiestone pai 40 agns di messe che lui al bramave tant di celebrâ te solenitât di san Martin come liturgjie di cumiât. Chel san Martin che, denant de muart, al à dit: “No mi pese il mâl e la fadie. Se i coventi ancjemò al to popul, ch’e sedi fate la tô volontât”. Nancje a pre Renzo no i à pesât la fadie e il dolôr. Al saveve che il timp al jere curt, ma nol à molât lis sôs messis, lis sôs funzions, il so puest di plevan. Par fâur capî cul esempli ce che nol rivave a dî cu la bocje: che ur voleve ben. “Probatio dilectionis exhibitio est operis”, “Lis voris che si mostrin a son la prove dal afiet che si à”, al dîs sant Augustin, un mestri in pastorâl.
Pre Renzo al parten a la mê gjenerazion e o vin vivût insieme dodis agns, ancje se dividûts par resons di classe. M’al visi cuant che, in teologjie, al jere lât a fâ il soldât. Une prove dure tai nestris timps. Sore dut parcè che si tratave di un zovin timit e sierât, par nuie prepotent o ribel. Mi à parût un at di incomprension che i à pesât. Come che di sigûr i àn pesât, fint a fâ sanganâ il so cûr za soferent, chei judizis pôc gjenerôs e chês sieltis pôc comprensibilis e comprensivis che i sorestants a àn cjapât tal cors dal so ministeri, dai agns di capelan a Dartigne e a Vile ai 31 di plevan cui Ciribits. Dut chest lu à ferît e sierât. Sore dut lu à sierât cu la int. Jessint sorestant di une comunitât, adiriture “pievano di Cervivento”, i pareve un delit fâsi mostrâ debul e vulnerabil e cussì nol à mai rivât a cjatâ inte int chel afiet, chel confuart, chel ungint che lu varès ristorât e, di chê altre bande, al continuave a puartâ chê autoritât che no lu capive e no lu judave.
Chest contrast interiôr lu sburtave a une fedeltât al limit de crudeltât, cence sparagnâsi in nuie. No si jere nancje sistemât a Çurçuvint che al è capitât il taramot, cun dutis lis conseguencis pe glesie, la canoniche e l’asilo. E il paîs. Il testaur de vecje plêf al restarà la testemoneance dal so bon gust, de sô finece, dal so sensibilitât e inteligjence. Un pipin di glesie, che i cantôrs e la partecipazion cjalde de int le rindin uniche tal circondari. Gjelôs de sô comunitât, al veve riscuviert lis lidrîs culturâls e religjosis che le peavin a la plêf di Guarf e cualchi an indaûr, cuant che la rogazion guartane e à fate stazion a Çurçuvint, si è smolât e lagrimant al à dit: “Tornait. No stait a lassânus dibessôi”.Un lamp di comozion e di umanitât come une sfressure sul torment e la sensibilitât de sô anime.
La int di san Martin si cjate a soterâ il cuart plevan in mieç secul. Un timp che le à viodude a cressi in partecipazion e in autocussience, riscuviergint l’arcje des tradizions e cirint di meti vin gnûf in bufulis vecjis. Il vueit al è grant ma lis risorsis a son tantis. Al sarès un delit stropâ une buse tant par stropâle o cun stropui che no van ben. Pal tant ch’al è stât sementât e che si è lavorât.
Pre Renzo al à volût soterâsi in paîs, come pre Vigji Zulianii, il mitic plevan di Çurçuvint. Mi pâr di viodi il siôr santul a ricevilu su la puarte dal simitieri e a disi ridint: “Ven chi, frut, a polsâ cun me e cu la nestre int. Une int buine. E nô, dal paradîs, o tignarìn di voli chest blec di paradîs”.