Olmis di Diu - A. Beline

E je une des tantis perlis dal libri di Isaie. Il profete si riferis a la gnove Sion, dute di fâ sù cu la gracie di Diu e cu la colaborazion e coresponsabilitât dal om. Di li la passion che e sburte il grant profete a berlâ e a cirî ogni strade e ogni mieç par rivâ in puart cuntun progjet cussì ambiziôs. “Par amôr di Sion no tasarai e par amôr di Gjerusalem no mi darai pâs fin che la justizie no crichi tanche l’albe e la sô salvece no lusi tanche une torce” (Is 62, 1). Peraulis cussì splendidis e incoradis no podevin no fâ vignî la gole a tancj oms, sore dut di glesie, di doprâlis come cjaveç di un document impuartant. Lu àn fat gardenâi, vescui, predis, ancje chi di nô. A son peraulis tremendis e impegnativis, che a van pesadis une par une.
Partìn di chel no tasê, di chel scugnî fevelâ, di chel imperatîf morâl di alçâ la vôs pe denunce di ce che nol va e pe proclamazion dai principis juscj. La glesie interie, tes sôs struturis di ogni ordin e grât, in alt e in bas, no à altre justificazion e mission che di no tasê, di fâsi cussience universâl. Ma par podê berlâ, par no jessi obleade a tasê e à une sole strade obleade: jessi libare. E par jessi libare e à une sole strade obleade: jessi puare. Une glesie fuarte, potente, temude e rispietade no rive a sintî il berli dal puar, il gemit dal presonîr, il jesolâ de vitime. Parcè che i mûrs dal so palaç a son masse pençs e lis stanzis dai siei ufizis masse altis e distantis par sintî i dolôrs de strade e de vite. Al massim e po fâ documents astrats, che no le metin in crisi jê e ancjemò mancul i distinataris dai proclamis e autôrs de injustizie e che di sigûr no zovin a di chei che a varessin di jessi i prins beneficiaris, vadì i ultins di chest mont. Se ancje e rive a sintî il berli, no po berlâ masse parcè che e je tignude di voli e ricatade di un continuo di chei che le frecuentin e le slissin, che i ricuardin, se e ves di dismenteâsi, i dovês di coretece, di buine armonie e di agrât tai confronts di chel podê che le trate cun tante gjenerositât. In concret, si puedie dî mâl de vuere cuant che si à i capelans e i vescui militârs? Il concordât al po jessi un ben par certs aspiets, ma a ce presit?
Il no tasê, il no dâsi pâs al po jessi verbâl e scrit ma al po jessi ancje morâl, di testemoneance. Al vâl di plui e al è capît di plui. Il vescul di Varsavie, Stanislaw Wielgus, al à scugnût dâ lis dimissions di primât polac la stesse dì che al cjapave posses de sô diocesi, cun grant scandul e turbament de int. Al veve acetade la colaborazion cui comuniscj par podê lâ a studiâ in Gjermanie e preparâsi miôr a la sô mission. No varessial vude une preparazion plui fuarte e cristiane restant a cjase e magari lant i preson par amôr di Crist e dal so popul? Pari Jerzy Popieluzsko, cu lis sôs messis pe patrie e cu la sô fin orende, torturât, incjavretât e butât muribont te Vistole, no aial berlât di plui, seben che al veve la bocje stropade? Il berli plui grant dal cristian al ven de sô vite e no de sô bocje.
Il profete al dîs che no si dà pâs pal ben di Sion e di Gjerusalem. Tant a dî che la robe plui impuartante, essenziâl e inrinunciabil, al è chest amôr pe int e pe tiere. Un amôr cence condizionaments e cence ripensaments. Domandìn il regâl e la gracie di une glesie che no à altre passion, mission, preocupazion, manìe che il ben matereâl e spirtuâl dal om, disponude ancje a murî par lui. Une glesie che no si sint indispensabil ma dome sierve inutil tes mans e tai progjets di Diu.