PRE JOSEF CJARGNEL AL È TORNÂT TE CJASE DAL PARI
30 di Dicembar 2017
Pre Josef Cjargnel (Giuseppe Cargnello), plevan di Guart e musicolic, al è tornât te Cjase dal Pari.
IL FUNERÂL AL È MIERCUS AI 3 DI ZENÂR TE PLÊF DI GUART AES 14:30.
Pre 'Sef al jere nassût a Remanzâs, ai 14 di Otubar dal 1940. Ordenât predi dal 1965, al è stât capelan te Parochie dal Carmine a Udin e po, dal 1972, cun bons. Laurinç Dentesan, predi te Plêf di Guart, dulà che, dopo de partence di pre Laurinç (†11.09.2015) al reste plevan, a pâr che tes parochiis di Mion e Rigulât. La sô atenzion aes problematichis dal rispiet e dai dirits de identitât dal Popul Furlan, e partìs ae fin agns Sessante dal Nûfcent. O ricuardìn: partecipazion ae Mozion dal Clericât di Udin (1967); simpri a fin agns Sessante, cun pre Checo Placerean e po cul grup “Cjargnei cence dius”: azion pal ricognossiment dal Messâl Furlan e pal dirit di doprâ la marilenghe pardut, te Glesie e tal Stât; redazion, cun pre Antoni Beline e pre Laurinç Dentesan, trê dîs dopo dal taramot dal 1976, dal document “Dopo taramot. Ai furlans che a crodin”: “prime lis fabrichis e po lis cjasis e lis glesiis”; publicazion dal librut pe Liturgjie “Cjantis di Glesie dal Popul Furlan pes diocesis di Cuncuardie – Pordenon, Udin, Gurisse”, racuelte di cjants liturgjics par furlan, pe plui part cjapâts sù de vive vôs de int; publicazion, cu la riviste “Jucunda Laudatio” dal benedetin Padre Pellegrino Ernetti, di “Canti sacri aquileiesi della tradizione orale”: une largje racuelte “sul cjamp”, di cjants patriarcjins di tradizion orâl, racuelte, cheste ultime, riviodude, completade e ripublicade tal 2007, cul titul “Cjants patriarcjins di tradizion orâl”; publicazion dal libri “Saghe furlane” (ed. Glesie Furlane), racuelte di contis, flabis, mitologjiis furlanis.
Cun pre Antoni Beline al colaborà fin dal inizi al periodic autonomist di Glesie Furlane “Patrie dal Friûl”. Al è un dai promotôrs de leture seguitive de Bibie par furlan, organizade e sostignude de ARLeF, in colaborazion cu la Arcidiocesi e la Provincie di Udin.
Cun bons. Laurinç Dentesan al à metût sù, dongje de antighe Plêf di Guart, il “Museu da Plêf”, par esponi lis testemoneancis storichis de antighe istituzion plevanâl. Il lavôr di ricercje sul Cjant Patriarcjin al à motivât, a so non, il premi Epifanie di Tarcint pal 2016.
(foto: www.natisone.it)