BIBIE IN LINIE

Cjapitul 4

Direzion

4 1 Parons, dait ai fameis ce ch’al è just e onest, savint che ancje vualtris o vês un paron in cîl.

Ultimis racomandazions

2 Tignît dûr te preiere e veglait in jê cun ricognossince; 3 preait ancje par nô, par che Diu nus spalanchi une puarte a la peraule par predicjâ il misteri di Crist, che par colpe sô o soi in preson, 4 par che lu palesi predicjant come che si conven.

5 Cun chei ch’a son fûr compuartaitsi cun sintiment, profitantsi di dutis lis buinis ocasions. 6 Il vuestri fevelâ ch’al sedi simpri plen di biel trat, saurît cul sâl, in mût di savê cemût rispuindii a ognun.

Notiziis e salûts

7 Su lis robis che mi rivuardin us informarà Tichic, fradi une vore cjâr, servidôr fedêl e gno compagn tal Signôr. 8 Us al mandi par che us meti al corint de nestre situazion e al confuarti i vuestris cûrs, 9 insieme cun Onesim, fradi cjâr e fedêl, ch’al è dai vuestris. Us informaran di dutis lis novitâts di chenti.

10 Us saludin Aristarc, gno compagn di presonie, e Marc, cusin di Barnabe, ch’o vês za vudis istruzions sul so cont – s’al ves di vignî di vualtris, viodêt di fâi un bon acet – 11 e Gjesù, che i disin Just. Di chei ch’a vegnin de circuncision, chescj a son i unics ch’a lavorin cun me pal ream di Diu: a son stâts lôr il gno confuart. 12 Us salude Epafre, vuestri paisan, servidôr di Crist Gjesù; lui al scombat di un continui par vualtris tes sôs preieris, par ch’o restais salts, perfets e impegnâts pardabon a fâ la volontât di Diu. 13 Di fat o garantìs jo che lui si preocupe une vore par vualtris, par chei di Laodicee e di Gjerapoli. 14 Us saludin Luche, il cjâr miedi, e Deme.

15 Saludait i fradis di Laodicee, Ninfe cu la comunitât che si dà dongje in cjase sô. 16 Cuant che o varês lete cheste letare, fasêtle lei ancje te Glesie di Laodicee; ancje vualtris leiêt chê ch’o cjaparês di Laodicee. 17 Disêt a Archip: “Viôt di fâ come cu va il ministeri che tu âs cjapât tal Signôr”.

18 Il salût al è scrit propit cu la mê man, di me, Pauli. No stait a dismenteâsi des mês cjadenis. La gracie ch’e sedi cun vualtris.

Notis:

  • 4,5 - Si riferìs ai paians, ch’a son di fûr.
  • 4,10 - Al podarès jessi Marc, chel ch’al à scrit il secont vanzeli.
  • 4,14 - Luche al è chel ch’al à scrit il tierç vanzeli e i Ats dai apuestui.
  • 4,16 - De letare a chei di Laodicee no nus è restât propit nuie. O savìn dome ce ch’al dîs culì.
  • 4,17 - Forsit Archip al jere fi di Filemon, chel de letare, ch’al jere sorestant de glesie di Colossis.
Cjapitui: