BIBIE IN LINIE

Cjapitul 3

Diu ur perdone a la int di Ninive

3 1 La peraule dal Signôr e plombà parsore di Gjone pe seconde volte. i disè: 2 “Jeve sù e va a Ninive, la grande, a contâi il mes che jo ti doi”. 3 Gjone si metè in viaç par lâ a Ninive seont la peraule dal Signôr. Ninive e jere une citât grande, lungje trê dîs di viaç. 4 Gjone, dopo di vê cjaminât dentri de citât par une dì interie, al berlà: “Ancjemò corante dîs e Ninive e sarà fiscade!”. 5 La int di Ninive i croderin a Diu e a ordenarin di zunâ, vistûts di sac dal plui grant al plui piçul.

6 Cuant che la gnove i rivà al re di Ninive, chel al jevà sù de sô sente, si gjavà il mantel regâl, si vistì di sac e al lè a sentâsi te cinise. 7 Al mandà fûr par Ninive un decret dal re e dai siei grancj: “Oms e besteam grant e minût no cerçaran un lafè di nuie, no passonaran e no bevaran aghe. 8 Che si cuviergin ducj di sac e a clamin Diu cun dute la lôr fuarce. Ognidun che si mendi de sô brute condote e de violence che e à sporcjadis lis sôs mans. 9 Pò stâi che Diu si ricrodi e al gambii idee, ch’al cessi dal fugôr de sô rabie e cussì no murarìn”. 10 Diu al viodè lis lôr voris, ven a stâi che si jerin mendâts de lôr brute condote. Alore Diu si pintì dal mâl che ur veve professât e no lu fasè gran.

Notis:

  • 3,3 - Trê dîs di viaç par girâ torator dal perimetri; clare esagjerazion.
  • 3,4 - Corante dîs: un trat di timp convenzionâl ch’al dà l’idee di une pazienze avonde grande.
  • 3,5 - Dute la citât e je cjapade dentri tal pecjât, e duncje dute e à di jessi cjapade dentri te penitince.
  • 3,7 - Seont une mentalitât primitive, ancje i nemâi a jerin a part dal ben e dal mâl dal om.
  • 3,10 - Si pintì. Diu al è viodût tant che un om (antropomorfisim) ch’al gambie idee. In câs al è l’om ch’al gambie vite, parcè che la idee di Diu e je simpri chê di salvâ.
Cjapitui:

Chest sît al dopre dai cookie, continuant a navigâ tu acetis di doprâju. Plui informazions.

Questo sito utilizza i cookie per fornire la migliore esperienza di navigazione possibile. Continuando a utilizzare questo sito senza modificare le impostazioni dei cookie o cliccando su "Accetta" permetti il loro utilizzo.

Chiudi