l’esperience MATRIMONIÂl dal profete
L’idolatrie e cjape simpri plui pît
10 1 Israel al jere un vignâl ben foltît,
ch’al butave une vore.
Ma plui e cresseve la sô uve,
plui al moltiplicave i altârs;
plui la sô tiere e jere buine,
plui a fasevin sù colonei di chei fins.
2 Il lôr cûr al è dividût
cumò a espiaran.
Lui al sdrumarà i lôr altârs,
al butarà jù i lôr colonei.
3 Alore a disaran: “No vin plui re!”.
“Parcè no vino vût timôr dal Signôr?
Ce puedial fâ par nô il re?”.
4 Peraulis sore peraulis, zuraments fals
e fâ aleancis;
il dirit al bute come la jerbe velenose
tai agârs dai miei cjamps.
5 Pal vidiel di Bet-Aven
e trime la int de Samarie.
Propit, par lui il so popul al fâs laments
insieme cui predis;
a vain pe sô glorie
parcè che ju à bandonâts.
6 Ancje lui al sarà puartât in Assur
come regâl pal grant re.
Efraim si tignarà la vergogne
e Israel al restarà malapaiât dal so idul.
7 Samarie e je finide! Il so re
al è tant che un len bandonât parsore da l’aghe.
8 A saran fiscâts i lûcs alts plens di delits,
il pecjât di Israel;
spinis e buralis a cressaran
parsore dai lôr altârs.
Alore ur disaran a lis monts: “Taponaitnus!”.
e a lis culinis: “Plombait parsore di nô!”.
Di Gabae in ca
9 Dai dîs di Gabae
tu âs pecjât, Israel!
Si son fermâts li.
Ma no ju gafarae
in Gabae une vuere?
Cuintri dai fîs de tristerie
10 o soi vignût par cjastiâju.
I popui si metaran insieme cuintri di lôr
par cjastiâju dal lôr dopli delit.
Invît a la conversion
11 Efraim al è une mange ben dumiesteade,
seneose di balinâ ator pa l’arie.
Ma jo o fasarai passâ il jôf
sore dal so cuel cussì fuart.
O tacarai Efraim al cjar,
Israel al ararà,
Jacop al tirarà la grape.
12 Semenait la semence de justizie,
cjapait sù il racolt de bontât,
lavorait un teren gnûf.
Al è rivât il timp di cirî il Signôr
fin che nol vignarà a fâ plovi
sore di vualtris la justizie.
Delits e menacis
13 Parcè vêso arade l’inicuitât
cjapade sù la tristerie,
mangjât il prodot de falsetât?
Za che tu ti sês fidât dai tiei cjars
e dal numar dai tiei cjavalîrs,
14 tes tôs citâts s’inviarà il savolton
e dutis lis tôs fuartecis a saran fiscadis,
te dì de batae,
come che Salman al à fiscât Bet-Arbel
smacaiant la mari parsore dai siei fruts.
15 Cussì us fasarai jo a vualtris, cjase di Israel,
pe vuestre tristerie cussì grande.
Te tampieste al sparissarà par simpri
il re di Israel.