Il libri di Amos
Prin profete minôr in ordin cronologjic, Amos al à vivût te seconde metât dal sec. VIII p.d.C. Nassût a Tekoe, ad ôr dal desert di Gjude, no lontan di Betlem, al à profetât tal Ream schismatic dal nord, prime a Betel e po a Samarie, te ete sflandorose e corote di Gjeroboam II (783-743).
Amos di mistîr nol jere “ni profete ni fi di profetis” ma piorâr. Di fat, cuant che al è parât fûr di Israel parcè che al tormente la triste cussience dai grancj e duncje al sint finide la sô mission, Amos al torne a passonâ i siei nemâi. Diu lu mande a profetâ cuintri de coruzion e dal lus sproposetât dai grancj, che a son un scandul e une ofese pe miserie dal popul. In cheste curnîs di grandece slavrade, ancje la religjon e piert il so aspiet di legjitimitât e valôr cultuâl e e devente un tirâ a ciment il Signôr.
Cu la viamence dal om vignût de solitudin e de essenzialitât dal desert, scuadrât cu la manarie, Amos al condane cence filet su la lenghe une societât fraide, sigurant l’intervent svindicatîf di Diu e la sô justizie. Il fruç al sarà propit la “zornade dal Signôr”, di une proporzion degne de santitât di Diu e dal côl sproposetât dai delits. Come in ducj i profetis, ancje chi un rest, il “rest di Josef” (5,15), si salvarà par contâ la glorie e la justizie di Diu e par dâ vite a un gnûf popul.
La origjinalitât di Amos no sta te sô dutrine ma te sô fuarce interiôr e te sigurece assolude che Diu al ten tes sôs mans la storie dai oms e dai popui e no ur sparagne nissun cjastic cuant che a sgarin, come che no ur sparagne nissune strade ni mieç par salvâsi.
Il libri si divît in dôs parts: inte prime (cc. 1-6) a son ripuartadis lis profeziis e sentencis; inte seconde a son ripuartadis cinc visions (cc. 7-9).