I libris des Cronachis
Il VT al à un secont mac di libris storics ch’a ripetin e a puartin indenant il toc di storie di Gjosuè ai Rês: si trate dai doi libris des Cronachis che, insieme cun Esdre e Neemie, a formin une opare unitarie. Si podarès fevelâ di une sorte di “biblioteche” su la storie dal popul ebraic, di cuant che a àn metude sù la monarchie fintremai a la restaurazion dopo dal esili. Come timp, staronzant, si va de fin dal sec. XI al inizi dal sec. IV p.d.C. Il prin libri des Cronachis al tache adiriture dal principi dal mont.
I doi libris si dividin in trê sezions:
I) Gjenealogjiis (1 Cr 1,1-9,44). A son lis gjenealogjiis ch’a partissin di Adam e a van fint a Saul e a David passant pai patriarcjis.
II) David-Salomon (1 Cr 10,1-2Cr 9,30). L’interès di fonde dal autôr al è pal templi e pal mont cultuâl ch’al gire ator dal templi. Di cheste istituzion e di chest mont, David al è chel ch’al prepare e al organize e Salomon chel ch’al fâs sù e al finìs.
III) Il ream di Gjude (2 Cr 10,1-36,23). L’autôr al salte di plante fûr il ream di Israel. Dai rês di Gjude i sta a cûr plui di dut il lôr ategjament religjôs.
La tradizion greche e latine e à viodût in chescj libris une sorte di integrazion dai libris storics; par chel ju à clamâts “Paralipòmenos”, tant a dî “libris des robis lassadis fûr o dismenteadis”. Vuê si riten plui just dâur un valôr par lôr cont. Di chi il non di “Cronachis” o “Anâi”, come ch’al lasse scrupulâ ancje il non ebraic di Dibrê jamîm (Peraulis o Fats dai dîs).
No si trate naturalmentri di une cronache come che s’int cjate in ete classiche o medievâl e tant mancul in dì di vuê. Il cronist al sielç i fats no partint de fedeltât storiche, ma de sô vision religjose. I fats plui impuartants a son chei che a metin in lûs la idee gjenerâl de vore: teocrazie e vite cultuâl. Il vêr re dal popul ebraic al è Diu e il re plui grant al è chel ch’al onore di plui Diu e il so templi. La furtune dal re e sarà un premi pe sô fedeltât e la disgracie e sarà un cjastic pe sô infedeltât. Sot chest aspiet, lis Cronachis a son un grant esam di cussience.
La presince di Diu framieç dal popul si palese in forme concrete tal templi, tai siei sacrificis e te laude eterne, fate di preieris, di cjants e di musiche. E chi l’autôr al pant une grande passion e une grande competence.
Si puedial ancjemò fevelâ di “storie” e di “veretât storiche”? Sigûr. Baste lei i libris cu lis limitazions ch’o vin ditis. E je une “storie religjose”, une sorte di esam teologjic de storie ebraiche antighe, ma là che il fat storic al à instès plui pês che no la speculazion teologjiche. Chest mût di tornâ a lei il passât par cirî lis resons dal ben pierdût e dal mâl cuistât, che i esperts lu clamin midrash, al è un gjenar leterari tipic dal gjudaisim postesilic.
Cui aial componude cheste storie vonde singolâr de teocrazie? Cuant? No cognossìn ni il so non ni il so timp. Disint che no le àn componude prin dal IV sec. e nancje dopo dal II sec. p.d.C. o sin sul sigûr. Il rest al è plui ipotetic.
Chescj libris a àn vude grande impuartance tal mont gjudaic (liturgjie sinagogâl, mentalitât legaliste o legjitimiste) e cristian (citazions e alusions tal GT, presentazion di Gjesù come fi di David; gjenealogjie di Crist e vie).