Il Pentateuc
I prins cinc libris de Bibie a son Gjenesi, Esodo, Levitic, Numars e Deuteronomi. Dutun a fasin il Pentateuc (= cinc fodris). I ebreus invezit a àn nant clamâju Torà (= insegnament, leç).
Il Pentateuc nol è stât scrit di une persone sole intune sole ete. Leint cuntun cimi di atenzion, di fat, si inacuargisi di cualchi robe stranie: la creazion e je contade dôs voltis e tun mût diferent (Gjen 1,1-2,3e Gjen 2,4-25); i 10 comandaments a son ripetûts in pratiche dôs voltis (Es 20,2-17 e Dt 5,6-21); il non “Bersabee” si lu interprete “poç dal zurament” in Gjen 21,31, ma “poç de bondance” in Gjen 26,26- 33; in Es 20,24, Diu al acete che a sedin plui templis, cu la cuâl che in Dt 12,4-5 Diu al diclare che il so templi al pò jessi dome un. E si podarès lâ dilunc cui esemplis tant che si vûl. Chescj câs nus permetin di dî che il Pentateuc al è stât componût in etis diferentis e di plui personis, che a àn simpri metût jù par scrit tradizions orâls vielononis.
La part plui antighe al semee ch’e sedi dal sec. X p.d.C.; e je stade scrite a Gjerusalem e si clame “scrit Jahvist”. Doi secui plui in ca, tal Ream dal nort, al jere za stât componût il “scrit Elohist”. Plui in ca, simpri a Gjerusalem, al ven butât fûr dal 622 p.d.C. il “scrit Deuteronomist”. Par finî, dopo dal esili i predis ebreus a componin il “scrit Sacerdotâl”. Chescj scrits, metûts un dongje di chel altri o miscliçâts insiemit, a fasaran il Pentateuc. Il mût di contâ, cjalantlu cussì, al semee sclet e che al scori vie ben; daûr, però, a son a messet tescj une vore viei e tescj plui resints, che i esperts a rivin a disferenceâju avonde pulît.
Il “scrit Jahvist” al presente contis un grum vivarosis e concretis. Teologjicamentri al à sot vie la grande idee universalistiche: il Diu di Israel al è un Diu par ducj i popui. Par cheste reson, il Messie al è imprometût al popul di Diu, ma par salvâ ducj.
Il “scrit Elohist” al è componût tun mût plui sclet e al scôr miôr. Lis ideis di fonde di dut il scrit a son il pat e l’impegn morâl.
Il “scrit Deuteronomist” al presente Mosè che, rivât dongje de tiere de promesse, al torne a lei l’esperience dal Esodo midiant di un mac di discors. L’idee teologjiche si pò strucâle cussì: Israel al è stât sielzût di Diu e dome par cheste reson il Signôr i vûl tant ben.
Il “scrit Sacerdotâl”, par finî, al è stât butât jù tun stîl une vore burocratic, grivi, ripetitîf, e al à come idee teologjiche di fonde la storie de salvece: Diu al opere a pro dal om e l’om i rispuint cu l’ubidience di une religjon che lu fâs sant.
Il libri de Gjenesi
La Gjenesi e je il prin libri de Bibie. I ebreus le clamin Bereshit (= Tal imprin), de prime espression che al scomence il test. La Gjenesi e conte la storie de umanitât, di cuant che al è stât creât il mont e l’om fint a Abram (Gjen 1-11) e di Abram fin cuant che i fîs di Jacop a son lâts jù in Egjit (Gjen 12-50).
La prime part le clamin “preistorie dai patriarcjis”. E conte di cemût che al è stât creât il mont, l’om e la femine, dal prin pecjât e dal mâl che al è lât slargjantsi te storie de umanitât (Cain e Abêl, il diluvi, la torate di Babêl). Chestis contis cualchi volte a son cjonçadis o separadis fra di lôr di lungjis gjenealogjiis o listis di vons: a son i oms dai timps vielonons, che a calin di etât par ordin che al cres il pecjât.
La seconde part le clamin “storie dai patriarcjis”. E conte la storie di Abram, di Isac, di Jacop e dai siei fîs (Josef vendût dai fradis e lôr che a van jù in Egjit dutun cul pari). I fîs di Jacop a son presentâts tant che i prins vons des tribûs dal popul ebraic.
Come composizion leterarie, il libri al è une vore ben inmaneât e unît. Ancje se tal libri de Gjenesi a son metûts adun tocs dal scrit Jahvist, di chel Elohist e di chel Sacerdotâl, al semee che i teolics deuteronomiscj si sedin contentâts dome di ritocjâ alc ca e là. E di fat il matereâl al è disponût cuntun ecuilibri di restâ. A lis cinc toledôt (gjenealogjiis, riundis, storiis) che a tratin il teme negatîf dai fîs di Adam (Gjen 1-11), si cuintriponin lis cinc toledôt dai patriarcjis, che a tratin il teme positîf dal rapuart dialogjic fra Diu e l’om.
I temis teologjics di fonde a presentin Diu che al cree e al dialoghe di un continui cu la sô creature, l’om, viodût tant che libar e pecjadôr, e che al à dibisugne di tornâ simpri a ripiâ il so rapuart cun Diu. Par cheste reson te Gjenesi o cjatìn la promesse di Diu che al salvarà l’om. E cheste promesse si palese e si fasarà simpri plui inte storie.