La seconde letare a Timoteu
La seconde letare pastorâl, mandade a Timoteu, e je cetant plui personâl che no la prime. Passant sore al so implant di letare, si podarès nant clamâle un testament spirituâl che Pauli i fâs al dissepul prin di murî (4,6-8). Dome cussì si pò capî chel bati e tornâ a bati su la fedeltât tal mantignî intat il depuesit de dutrine sane – tradizion – e tal lâ indenat sul stamp di Pauli, l’apuestul, il martar, cursôr e mestri dal vanzeli (1,11).
La letare si vierç come simpri cu la direzion e cui salûts (1,1-2) e e va dilunc cu lis cuistions tipichis des letaris pastorâls. Daspò dal ringraciament e dal ricuart personâl (1,3-5), si insegne e si racomande il mût di fâ il pastôr, ch’al torne fûr plui voltis (1,6-8; 2,1-7; 3,10-4,5). Il spieli plui complet dal pastôr al è Pauli (1,11-18; 4,8-13). In jenfri di chestis racomandazions, si cjate il rimpin teologjic, cun tocs di dutrine, cjantis e preieris (1,9-10; 2,8-13). Il cûr de letare Pauli lu ten par tacâ cun viamence e a lunc i eretics (2,14-3,9) e al zonte, a la barufe, ancje l’istruzion e la racomandazion. La letare si siere cu lis ultimis istruzions e cui salûts (4,9-22).
Partint des sôs liendis personâls, Pauli al rive a creâ la clime adate par proponi la figure ideâl dal apuestul, model dal pastôr. E il pastôr nol à dome di rispuindi de comunitât, ma al à ancje di jessi un spieli pai cristians.