la glesie framieç dai ebreus
Discors di Stiefin
7 1 Il sorestant dai predis i domandà: “Ise propit cussì?”. 2 E lui i rispuindè: “Fradis e paris, scoltait. Il Diu de glorie i comparì a Abram, nestri von, ancjemò in Mesopotamie, prin che si implantàs in Aran 3 e i disè: Lasse la tô tiere e la tô parintât e va te tiere che ti mostrarai jo . 4 Sicheduncje al bandonà la tiere dai caldeus par sistemâsi in Aran. Muart so pari, Diu lu fasè passâ di li inte tiere ch’o sês a stâ vualtris cumò. 5 No lu fasè paron di nuie in cheste tiere, nancje tant di poiâ il pît ma i imprometè di dâje in ereditât a lui e a la sô dissendence daûr di lui , seben che nol veve fîs. 6 E Diu i disè che la sô dissendence e vares vût di lâ in tiere foreste , che le varessin ridusude in sotanance e che le varessin tibiade par cuatricent agns. 7 Ma il popul che ju tignarà sotans, i fasarai jo sentence , dissal il Signôr. Podopo s’int laran di li e mi adoraran in chest lûc. 8 Plui in ca al fasè cun lui il pat de circuncision; al è cussì che, deventât pari di Isac, Abram lu circuncidè sui vot dîs . Isac al fasè compagn cun Jacop e Jacop cui dodis patriarcjis.
9 I patriarcjis, gjelôs di Josef , lu venderin mandantlu ventijù pal Egjit. Ma Diu al jere cun lui : 10 lu liberà di dutis lis sôs tribulazions e i dè gracie e sapience denant dal faraon , re dal Egjit , che lu fasè sorestant dal Egjit e di dute la sô famee . 11 A capitarin alore sun dut l’Egjit e in Canaan fan e grande miserie, che i nestris vons no cjatarin nuie ce mangjâ. 12 Sintint che jù pal Egjit and jere forment , Jacop al mandà i nestris vons une prime volte. 13 La seconde volte Josef si fasè ricognossi dai siei fradis e il faraon al vignì a savê de sô riunde. 14 Josef al mandà alore a clamâ so pari Jacop e dute la sô int, ch’a jerin in setantecinc di lôr . 15 E cussì Jacop al lè in Egjit , al murì ventijù , lui e i nestris vons. 16 I lôr cuarps ju puartarin a Sichem e ju meterin tal tombâl che Abram al veve comprât paiantlu in bêçs ai fîs di Emor , in chel di Sichem .
17 Svicinantsi il moment di ce che Diu i veve imprometût a Abram, il popul al cressè di numar e si moltiplicà in Egjit 18 fintremai ch’al montà sù un gnûf re , che no si visà altri di Josef . 19 Doprant l’imbroi cuintri de nestre gjernazie , chest re al maltratà i nestris vons, al pont di obleâju a butâ vie la lôr canae par no ch’a vivessin . 20 Al è in chê volte ch’al nassè Mosè, che i plaseve che mai a Diu. Al fo mandât par trê mês in cjase di so pari. 21 Daspò lu butarin vie, ma la fie dal faraon lu cjapà sù e sal tirà sù come ch’al fos stât so fi . 22 Cussì Mosè al imparà dute la sapience dai egjizians e al valeve un grum in peraulis e in voris.
23 Rivât su la corantine, i vignì sù di lâ a cjatâ i siei fradis , i fîs di Israel . 24 Viodint che i fasevin malegraciis a di un di lôr, si metè de sô bande e al svindicà il sotan copant l’egjizian . 25 Si inludeve che i siei fradis a varessin capît ch’al jere Diu che ju salvave midiant di lui, ma lôr no capirin gran. 26 Tal indoman, int viodè che si petavin e al cirì di metiju d’acuardi. O sês fradis, dissal; parcè po si fasêso malegraciis un cul altri? 27 Alore chel ch’al pacave il so compagn lu parà vie disint: Cui ti àial metût sorestant e judiç parsore di nô? 28 Volaressistu par câs copâmi , come che îr tu âs fat fûr l’egjizian? 29 Sintint cussì , Mosè al scjampà e al lè a parâsi te tiere di Madian , là che i nasserin doi fîs.
30 Passâts corant’agns, i comparì un agnul tal desert de mont dal Sinai, te flame di un baraçâr ch’al brusave . 31 Mosè al jere sconsortât a viodi une robe di chê fate. Biel ch’al leve indenant par viodi miôr, si fasè sintî la vôs dal Signôr: 32 Jo o soi il Diu dai tiei vons , il Diu di Abram , il Diu di Isac e di Jacop . Scaturît, Mosè nol olsave a cjalâ. 33 Alore il Signôr i disè: Gjaviti la cjalçadure dai pîts , parcè che la tiere che tu balinis e je une tiere sante . 34 O ài viodude la disperazion dal gno popul in Egjit ; o ài scoltât i siei gemits e o soi vignût jù par sfrancjâju . Anìn , che ti mandi in Egjit .
35 Chel Mosè che lu vevin rifudât disint: Cui ti àial metût sorestant e judiç , Diu ur al mandave sicu sorestant e salvadôr midiant dal agnul che i jere comparît tal baraçâr . 36 Al è lui che ju menà fûr , fasint spiei e meracui te tiere dal Egjit , tal mâr Ros e tal desert par corant’agns . 37 Al è lui, Mosè, che ur à dit ai fîs di Israel: Diu al fasarà vignî fûr dai vuestris fradis un profete compagn di me . 38 Al è lui che, in semblee tal desert, al faseve di mediatôr fra l’agnul che i fevelave su la mont dal Sinai e i nestris vons; e lui al sintì lis peraulis de vite par dânuses a nô. 39 Ma i nestris vons no àn volût savênt di ubidîlu, e, ch’al è piês, lu refudarin e a tornarin cul cûr in Egjit , 40 disint a Aron: Fasinus dius ch’a marcin denant di nô , parcè che Mosè , che nus à fats saltâ fûr de tiere dal Egjit , no savìn ce che i è sucedût . 41 A faserin un vidiel e i ufririn un sacrifici al diu, contents e sodisfats pe vore des lôr mans. 42 Alore Diu ur voltà la muse e ju molà a la religjon de schirie dal cîl , come ch’al è scrit tal libri dai profetis:
43 Mi vêso ufrît vitimis e sacrificis
par corant’agns tal desert, famee di Israel?
O vês puartade ator la tende di Moloc
e la stele dal diu Refan,
statuis che si vevis fat par adorâlis;
pa la cuâl us depuartarai plui in là di Babilonie.
44 I nestris vons tal desert a vevin la tende dal pat, come ch’al veve disponût chel che i fevelave a Mosè . I veve ordenât di fâ daûr dal stamp che i veve mostrât . 45 Dopo di vêle vude, i nestris vons, sot di Gjosuè, le menarin te tiere cjapade ai forescj che Diu ju veve fats cori denant di lôr. E li e restà fint a David, 46 chel che i plasè a Diu e i domandà la furtune di cjatâ un lûc pe cjase di Jacop . 47 I tocjà a Salomon di fâi sù une cjase , 48 ma l’Altissim nol sta gran tes cjasis fatis de man dal om, come ch’al dîs ancje il profete:
49 Il cîl al è la mê sente
e la tiere il scagn pai miei pîts.
Ce cjase podaressiso fâmi, al dîs il Signôr,
e cuâl saraial il lûc là ch’o podarai polsâ?
50 No ise stade la mê man a fâ dut chest?
51 Cjâfs dûrs , orelis e cûrs paians , si metêso propit simpri cuintri dal Spirtu Sant? Ce ch’a son stâts i vuestris vons, precîs edentic o sês ancje vualtris. 52 Isal un profete che i vuestris vons no lu vedin perseguitât? A àn copât chei ch’a disevin ch’al veve di vignî il Just, chel che vualtris lu vês a pene tradît e sassinât, 53 vualtris ch’o vês vude la leç midiant des disposizions dai agnui e no le vês metude gran in pratiche”.
54 Sintintlu, ur vignive sù la rabie e a crustavin i dincj cuintri di Stiefin.
Vision di Stiefin e lapidazion
55 Plen di Spirtu Sant, lui al cjalà sù fis viers il cîl e al viodè la glorie di Diu e Gjesù in pîts a la sô gjestre. 56 Alore al disè: “O viôt i cîi spalancâts e il Fi dal om in pîts a la gjestre di Diu”. 57 Petant grancj berlis, si stroparin lis orelis e si butarin intor di lui; 58 lu sburtarin fûr de citât e si meterin a clapadâlu. I testemonis a poiarin i lôr vistîts dapît di un zovin di non Saul. 59 E intant che lu claponavin, Stiefin al preave cussì: “Signôr Gjesù, cjol la mê anime”. 60 Po si pleà sui genôi e al disè a fuart: “Signôr, no sta metiur in cont chest pecjât”. E cun chestis peraulis, si indurmidì vie.