Gjesù cause di salvece eterne cul so sacrifici, plui grant di ducj i sacrificis dal VT
10 1 Stant duncje che la leç e je dome un’ombre dai bens a vignî e no la realtât des robis, no à la virtût di smondeâ fint insom, midiant di chei sacrificis che si fasiju simpri an par an, chei che si svicinin a Diu. 2 Senò, no si varessial fat di mancul di ufrîju, dal moment che i fedêi, smondeâts une volte par dutis, no varessin vude plui cussience dai pecjâts? 3 Invezit, midiant di chei sacrificis, nus ven puartât indenant an par an il ricuart dai pecjâts, 4 parcè che al è impussibil di parâ jù i pecjâts cul sanc dai mançs e dai becs. 5 Par chel, jentrant tal mont, Crist al dîs:
Tu no tu âs volût ni sacrificis ni ufiertis;
invezit tu mi âs prontât un cuarp.
6 No tu âs vût a grât
ni olocauscj ni sacrificis pai pecjâts.
7 Alore o ài dit: Ve, o ven jo
– parcè che tal rodul dal libri si scrîf di me –
a fâ, Diu, la tô volontât.
8 Dopo di vê dit: No tu âs volût e no tu âs vût a grât ni sacrificis ni ufiertis, ni olocauscj ni sacrificis pal pecjât , dute robe che si ufrìs seont la leç, 9 al zonte: Ve, o ven jo a fâ la tô volontât . Cun chest lui al bute jù il prin sacrifici par fânt un gnûf. 10 E al è propit par chê volontât che nô o sin stâts fats sants, midiant de ufierte dal cuarp di Gjesù Crist, fate une volte par simpri.
11 Ogni predi si presente ogni dì a funzionâ e a ufrî une vore di voltis i stes sacrificis, che no puedin par mai parâ jù i pecjâts. 12 Lui, invezit, vint ufiert un sacrifici pai pecjâts une volte par simpri, si è sentât a la gjestre di Diu 13 e cumò al spiete dome che i siei nemîs a sedin metûts sot dai siei pîts. 14 Parcè che cuntune uniche ufierte lui al à smondeâts dal dut e par simpri chei ch’a son fats sants. 15 Chest nus al sigure ancje il Spirtu Sant. Di fat, dopo di vê dit:
16 Chest al è il pat che jo o fasarai cun lôr
dopo di chescj dîs, al dîs il Signôr:
o metarai la mê leç intai lôr cûrs
e le stamparai intal lôr cjâf,
17 al zonte:
E no mi visarai plui dai lôr pecjâts e des lôr inicuitâts.
18 Là che duncje i pecjâts a son perdonâts, nol covente plui fâ ufiertis pal pecjât.
Esortazion a la fedeltât a Crist
19 Vint duncje, fradis, plene libertât di jentrâ tal santuari midiant dal sanc di Gjesù, 20 par cheste strade gnove e vive che le à screade par nô a traviers dal vêl, vadì de sô cjar, 21 vint un grant predi sore de cjase di Diu, 22 svicinìnsi cuntun cûr sclet e plens di fede, cui cûrs smondeâts di une cussience triste e cul cuarp lavât cun aghe monde. 23 Mantignìn cence clopâ la profession de nestre sperance, parcè che chel ch’al à imprometût al è di peraule.
24 Cjalìnsi un cul altri par sburtâsi tal amôr e tes oparis di ben; 25 no stait a disertâ lis vuestris cunvignis, come che cualchidun al è usât a fâ, ma fasêtsi fuarce un cul altri; tant plui ch’o viodês che si sdongje la zornade.
26 Partant, s’o pecjìn a pueste dopo di vê cognossude la veretât, no ’nd è plui sacrificis di sorte pai pecjâts 27 ma dome la tremende spiete dal judizi e la ire di un fûc ch’al varà di gloti i ribei. 28 Cuant che cualchidun al è lât cuintri de leç di Mosè, al è condanât a muart cence remission su la peraule di doi o trê testemonis. 29 Ce cjastic plui grant no si mertarajal chel ch’al varà tibiât il Fi di Diu e ritignût ordenari chel sanc dal pat che une dì lu à fat sant e al varà spreseât il Spirt de gracie? 30 O savìn benon cui ch’al à dit: A mi il svindic! O darai jo la pae! E ancje: Il Signôr al fasarà sentence dal so popul. 31 Al è di sgrisulâsi a colâ tes mans dal Diu vîf!
32 Rifrescjait la memorie di chei dîs che, dopo di jessi stâts inluminâts, o vês scugnût frontâ tantis vitis e patiments, 33 mo svilanâts e maltratâts denant di ducj, mo fasìnsi solidaris cun chei ch’a jerin tratâts cussì. 34 Di fat o vês vude part tai patiments dai presonîrs e o vês acetât cun gjonde che us puartassin vie dute la vuestre robe, cussients di jessi parons di bens plui grancj e ch’a durin di plui. 35 No stait alore a pierdi la vuestre fiducie, ch’e varà une grande ricompense. 36 Us covente dome di tignî dûr, par podê rivâ a la promesse, dopo di vê fate la volontât di Diu.
37 Ancjemò un pôc, di fat , a pene un pôc
e chel ch’al à di vignî al vignarà e no s’intardarà.
38 Il gno just al vivarà midiant de fede;
ma s’al torne indaûr, la mê anime no lu varà a grât.
39 Nô però no sin di chei ch’a tornin indaûr par lâ a finîle malamentri, ma oms di fede par salvâ la nestre anime.