La salvece midiant de gracie
2 1 Ancje vualtris o jeris muarts par colpe dai vuestris straviaments e dai vuestris pecjâts 2 che par vieri o vivevis seont il spirt di chest mont, seont il princip dal ream dal aiar, chel spirt che orepresint al è in vore framieç dai oms ribei. 3 Fra di lôr une volte o vin vivût ducj nô, cjapâts des bramis de cjar, contentant lis picis de cjar e i siei istints; e o jerin par disposizion naturâl fîs de ire, a pâr di ducj chei altris. 4 Ma Diu, ch’al è splendit tal perdonâ, pal amôr cence misure che nus à amâts, 5 cun dut ch’o jerin muarts par vie dai straviaments, nus à fats tornâ a vivi cun Crist: di fat o sês stâts salvâts par gracie. 6 E nus à resussitâts e fats sentâ te spice dai cîi in Crist Gjesù, 7 par pandi, tai secui a vignî, cu la sô bontât viers di nô in Crist Gjesù, la ricjece straordenarie de sô gracie.
8 Di fat o sês salfs par cheste gracie, midiant de fede; e chest nol diven di vualtris ma al è un don di Diu. 9 No jentrin nancje lis oparis, par che nissun nol vedi ce vantâsi. 10 In veretât nô o sin opare sô, creâts in Crist Gjesù pes buinis oparis che Diu al à predisponût par che lis metessin in vore.
Unitât in Crist
11 Par chel tignît a ments che une volte vualtris, paians inte cjar, clamâts incircuncidûts di chei che si dìsin circuncidûts par vie di une operazion fate inte cjar, 12 o jeris in chê volte cence Crist, escludûts dal dirit di citadinance di Israel, straneâts de aleance de promesse, cence sperance e cence Diu in chest mont. 13 Cumò invezit in Crist Gjesù vualtris, che une volte o jeris i lontans, o sês deventâts i vicins in gracie dal sanc di Crist.
14 Di fat lui al è la nestre pâs
e al à fat di doi popui une sole unitât,
butant jù il mûr che ju divideve,
15 anulant te sô cjar la inimicizie,
cheste leç di comandaments cui siei ordins,
par rivâ a creâ in sè, di doi popui, un sôl om gnûf
metintju in buinis,
16 e par riconciliâju ducj i doi cun Diu intun sôl cuarp
midiant de crôs,
dopo di vê copade in sè la inimicizie.
17 Lui al è vignût par predicjâ la gnove de pâs
a vualtris, ch’o jeris lontans, e pâs a chei ch’a jerin vicins .
18 Midiant di lui, ducj i doi o podìn presentâsi cun libertât
al Pari intun sôl Spirt.
19 Sicheduncje no sês plui forescj ni pelegrins, ma dal stes paîs dai sants e de stesse famee di Diu. 20 La vuestre cjase e à par fonde i apuestui e i profetis, biel che Crist Gjesù al è la piere di cjantonâl. 21 Sore di lui dute la cjase e va sù ben disponude come templi sant tal Signôr; 22 in lui ancje vualtris o sês cjapâts dentri te costruzion come cjase di Diu intal Spirt.