JUDIZI E PROMESSIS PAR GJUDE
Il judizi cuintri dai popui
4 1 Parcè che ve, in chei dîs e in chê volte,
cuant che o varai tornât a meti in pîts Gjude e Gjerusalem,
2 o tirarai dongje ducj i forescj,
ju fasarai lâ jù te val di Gjosafat;
li o implantarai une cause cuintri di lôr
par vie di Israel, gno popul e mê proprietât,
che lu àn dispierdût framieç dai forescj
e si son spartîts la mê tiere.
3 A àn tirât a bruscjete il gno popul, a àn dât vie i fruts in gambi des pelandis, a àn vendudis lis frutis pal vin ch’a àn bevût.
Cuintri dai fenîs e dai filisteus
4 Poben, ce isal fra vualtris e me, Tîr e Sidon? E ducj vualtris, distrets dai filisteus? Volêso svindicâsi di me? S’o vês chê di svindicâsi di me, o fasarai plombâ dal moment e tun batût di voli il gno svindic sul vuestri cjâf. 5 Vualtris o vês robât il gno arint e il gno aur e o vês puartâts i miei tesaurs tai vuestris templis; 6 la int di Gjude e di Gjerusalem le vês vendude ai grêcs, par slontanâle de sô tiere. 7 Ve chi ch’o soi, par tornâju a clamâ dal lûc là che ju vês vendûts e par fâ tornâ a plombâ lis vuestris voris sui vuestris cjâfs. 8 O vendarai i vuestris fîs e lis vuestris fiis a la int di Gjude, ch’a tornaran a vendiju ai sabeus, a di un popul lontan. Propit! Al è il Signôr ch’al fevele!
I forescj invidâts a la vuere sante
9 Contait cheste framieç dai forescj:
proclamait la vuere sante,
sveait i valorôs,
che si fasin indenant, ch’a vegnin sù ducj chei ch’a combatin!
10 Mudait lis vuestris manariis in spadis
e i vuestris falcets in lancis.
Chel ch’al è flap ch’al disi: Jo o soi un valorôs!
11 Dai, vignît, forescj di dulintor
e daitsi dongje li!
Fâs vignî jù, Signôr, i tiei valorôs!
12 Che si svein, ch’a vegnin sù i forescj
viers de val di Gjosafat!
Li jo mi senti par fâ sentence
di ducj i forescj dulintor.
13 Cjapait in man il falcet:
il forment al è palomp!
Vignît, folait:
il turcli al è plen!
I brantiei a van parsore:
tant e je grande la lôr tristerie!
14 Fulugnis e fulugnis
te val de Decision!
La zornade dal Signôr e je dongje
te val de Decision!
15 Il soreli e la lune si scurissin,
lis stelis a pierdin dut il lôr sflandôr!
16 Il Signôr al rugne di Sion,
al fâs sintî la sô vôs di Gjerusalem.
Ma il Signôr al è un ripâr pal so popul,
une fuartece pai fîs di Israel.
17 Cussì o savês che jo o soi il Signôr, vuestri Diu,
ch’al è a stâ in Sion, su la mê sante mont.
Gjerusalem e je un santuari,
i forescj no passin plui par li.
Restaurazion dal paradîs par Israel
18 In chê dì
su pes monts al gotarà vin gnûf
e pes culinis al scorarà il lat
e in ducj i riui di Gjude
a spissularan aghis.
Une risultive e saltarà fûr de cjase dal Signôr
e e bagnarà la concje di Sitim.
19 L’Egjit al deventarà une pradarie bandonade,
Edom al deventarà un desert desolât,
pes violencis cuintri de int di Gjude,
pal sanc nocent spandût in te lôr tiere.
20 Ma Gjude al varà simpri int
e Gjerusalem di ete in ete.
21 O svindicarai il lôr sanc, no lu lassarai cence svindic
e il Signôr al varà la sô cjase in Sion.