BIBIE IN LINIE

Cjapitul 1

Titul

1 1 Peraule dal Signôr che i je stade dite a Gjoel, fi di Petuel.

JUDIZI E PROMESSIS PAR GJUDE

Lamentazions

2 Sintît cheste, anzians,

scoltait ducj, int de tiere.

Ise mai capitade une tâl tai vuestris dîs

o tai dîs dai vuestris vons?

3 Contaitlu ai vuestris fîs

e i vuestris fîs ai lôr fîs

e i lôr fîs a la ete ch’e ven dopo.

4 Il vanzum dal vier lu à sfulminât il zupiot

e il vanzum dal zupiot lu à sfulminât la ruie

e il vanzum de ruie lu à sfulminât il zupet.

5 Sveaitsi, cjochetons, e craçait!

Lamentaitsi ducj vualtris ch’o bevês vin,

pal most che us è stât gjavât di bocje!

6 Un popul al plombe su la mê tiere;

al è fuart e no si rive a contâlu.

I siei dincj a son dincj di leon,

al à masselârs di leonesse.

7 Al à ridusudis lis mês vîts a un grum di vidicis,

i miei fiârs a tais di len sec;

ur à gjavade dute la scuarce, ju à butâts jù,

i lôr ramaçs a son deventâts blancs cjandits.

8 Vai, come une fantate vistude di sac

pal nuviç de sô zoventût.

9 Ufierte e libagjon a son scomparidis

de cjase dal Signôr.

A fasin corot i predis,

i servidôrs dal Signôr.

10 La campagne e je scrodeade,

il teren al è in corot:

parcè che il forment al è fiscât,

most no ’nd è plui,

il vueli al è finît!

11 Splaçaitsi di muse, vualtris ch’o lavorais la tiere,

berlait, vualtris ch’o coltais la vît,

pal forment e pal vuardi:

dut il racolt dai cjamps al è lât pierdût.

12 La vît si è secjade,

il fiâr si è scridelît;

il miluçâr ingranât, insieme cu la palme e il miluçâr,

ducj i arbui dal cjamp si son secjâts.

Propit, e je sparide la ligrie

framieç de int.

Invît a fâ pinitince

13 Peaitsi il sac tor de vite, dait sù il lament, predis,

berlait, servidôrs dal altâr.

Vignît, veglait vistûts di sac,

servidôrs dal gno Diu.

De cjase dal vuestri Diu e je scomparide

ufierte e libagjon.

14 Ordenait il dizun,

clamait a semblee,

dait dongje i anzians,

dute la int de tiere

te cjase dal Signôr vuestri Diu

e berlait viers dal Signôr!

La zornade dal Signôr

15 Joi, la zornade!

Propit! La zornade dal Signôr e je dongje,

e ven come il fruç di Chel ch’al pò dut!

16 Po no ise vere? Denant dai vuestris vôi

al è scomparît il mangjâ;

de cjase dal nestri Diu

la ligrie e la gjonde.

17 E je secjade dute la semence

dentri tes cumieriis;

si son disvuedâts i depuesits,

a son sdrumâts i cjascj

parcè che il forment al è finît.

18 Cemût che si lamente il besteam!

Lis mandriis dai bûs a van indenant a sorte

Parcè che no cjatin plui passon.

Ancje i trops des pioris le stan paiant!

Preiere di Gjoel

19 O berli viers di te, Signôr!

Il fûc al à fiscâts

i passons de pustote;

la flame e à consumadis

dutis lis plantis dal cjamp.

20 Ancje i nemâi de campagne

a berlin viers di te,

parcè che i riui si son suiâts

e il fûc al à fiscâts i passons de pustote.

Notis:

  • 1,1 - Il non dal profete, ch’al vûl dî “Il Signôr al è Diu”, al salte fûr ancje di altris bandis de Bibie. Chel dal pari dome culì.
  • 1,4 - Si tratial di cuatri ondadis di zupets o di cuatri moments de vite dal zupet o di cuatri insets diferents?
  • 1,7 - Lis vîts e i fiârs a jerin l’ornament plui biel de Tiere prometude.
  • 1,9 - I predis a fasin corot parcè che a son restâts cence sostentament e cence funzions.
  • 1,11 - Il forment e il vuardi a jerin lis culturis plui slargjadis in Israel.
  • 1,13 - I predis a son servidôrs dal altâr e rapresentants dal popul denant dal Signôr.
  • 1,14 - A vegnin contâts, par ordin, ducj i moments di une liturgjie publiche di penitince.
  • 1,15 - La zornade dal Signôr e je un dai grancj temis de predicazion profetiche. Par Gjoel si trate di une zornade vicine, grande e tremende.
  • 1,18 - La desolazion no cjape dome i cjamps, ma ancje i passons, là che no ’nd è plui un fîl di jerbe nancje pes pioris.
  • 1,20 - Ancje i nemâi de campagne. No podìn no pensâ a la cerve, ch’e brame di ristorâsi tune risultive di aghe (Sal 42,2).
Cjapitui:

Chest sît al dopre dai cookie, continuant a navigâ tu acetis di doprâju. Plui informazions.

Questo sito utilizza i cookie per fornire la migliore esperienza di navigazione possibile. Continuando a utilizzare questo sito senza modificare le impostazioni dei cookie o cliccando su "Accetta" permetti il loro utilizzo.

Chiudi