il libri dal emanuel
PRIME PART
Clamade e mission di Isaie
6 1 Tal an de muart dal re Ozie, jo o ài viodût il Signôr sentât suntune sente alte e metude in alt e i ôrs dal so mant a cuviergevin il templi. 2 Sore di lui a jerin serafins: ognidun di lôr al veve sîs alis; cun dôs si taponavin la muse, cun dôs si taponavin i pîts e cun dôs a svolavin. 3 E un i berlave a di chel altri:
“Sant, sant, sant al è il Signôr des schiriis;
dute la tiere e je incolme de sô glorie”.
4 I antîi dai soiârs a trimavin pe vôs di chei ch’a berlavin, biel che il templi si jemplave di fum. 5 E o ài dit:
“Joi, ch’o soi lât!,
parcè che o soi un om cui lavris soçs
e o vîf framieç di un popul
cui lavris soçs;
distès i miei vôi a àn viodût
il re, il Signôr des schiriis”.
6 Alore un dai serafins al à svolât viers di me tignint te man un cjarbon impiât che lu veve cjapât sù cu lis paletis dal altâr. 7 Mi à tocjade la bocje e mi à dit:
“Ve, chest al à tocjât i tiei lavris;
la tô colpe e je tirade vie
e il to pecjât parât jù”.
8 Po o ài sintude la vôs dal Signôr ch’e diseve: “Cui mandarajo? Cui laraial par nô?”. Jo i ài rispuindût: “Ve chi ch’o soi, mandimi me!” 9 Alore lui al à dit: “Va e dîsii a di chest popul:
Scoltait ben, ma cence capî,
cjalait ben, ma cence ricognossi.
10 Ingrasse il cûr di chest popul,
impengìs lis sôs orelis,
tapone i siei vôi,
par no ch’al viodi cui siei vôi
ni ch’al scolti cu lis sôs orelis
ni ch’al capissi cul so cûr,
e si mendi e al vuarissi”.
11 Jo i ài dite: “Fin cuant mo, Signôr?”. Lui mi à rispuindût:
“Fin che lis citâts no saran bandonadis,
cence int, lis cjasis cence oms
e la tiere fiscade e pustote”.
12 Il Signôr al slontanarà la int
e la desolazion e sarà grande te tiere.
13 E restarà une decime part
ma e sarà consumade di gnûf,
come il rôl e il terebint
che, sdrumâts, al reste dome il çoc.
Ma il çoc al sarà une gjernazie sante.