I delits di Ninive
3 1 Puare mai jê la citât plene di sanc,
dute fodrade di imbroi,
plene di robariis,
che no cesse mai di slambrâ!
2 Un sivîl di scorie,
un sunsûr di ruedis ch’a ciulin,
cjavai ch’a gripin, cjars ch’a trabuchin
3 e cjavalîrs ch’a dan sot;
spadis ch’a incein e sflandorâ di lancis;
un stragjo di ferîts e un disordin di muarts;
i cadavars no si rive a contâju,
s’inçopedisi sui muarts.
4 Par colpe des masse prostituzions de sdrondine,
de biele preferide,
de incjantadorie di mistîr,
ch’e tibiave i popui cu lis sôs trainis,
lis gjernaziis cui siei striaments!
5 Ve chi ch’o soi! Chi di te! Sentence dal Signôr des schiriis.
Ti tirarai vie i vêi che tu âs fin su la muse
e ur mostrarai ai forescj la tô vergogne
e ai reams il to disonôr!
6 Ti butarai intor lis tôs porcariis,
ti cuvierzarai di disonôr,
ti fasarai deventâ un sbeleç.
7 Alore ducj chei che ti viodaran
si slontanaran di te e a disaran:
“Ninive! Ce desolazion! Cui podaraial consolâle?
No si cjatarà nissun che le consoli”.
Compagn di Tebe
8 Sêstu forsit plui fuarte di Tebe,
che si slungjave ad ôr dai canâi dal flum,
ch’e veve come vuaite il mâr
e l’aghe i faseve di murae?
9 L’Etiopie e l’Egjit a jerin la sô potence;
no veve confins;
Put e chei de Libie a jerin siei aleâts.
10 Ancje jê e à scugnût partî pal esili,
lâsint in sclavitût.
I siei fruts a son stâts smacaiâts
tal mieç des placis;
sui siei grancj a àn tirade la bruscjete
e ducj i siei sorestants ju àn peâts cu lis cjadenis.
11 Ancje tu tu restarâs intrunide, tu sarâs folpeade;
ancje tu tu varâs di cirîti un salvament denant dal nemì.
Al è dibant prontâ difesis
12 Dutis lis tôs fuartecis a son come fiârs
cjamâts di flôrs;
se si ju spache, a colin
juste te bocje di chel ch’al vûl mangjâju.
13 Ve il to popul: a son femenutis dentri des tôs muris;
denant dai tiei nemîs si spalanchin
lis puartis de tô tiere;
il fûc al à glotûts i tiei clostris.
14 Va a urî aghe par cuant che tu sarâs sidiade,
rinfuarce lis tôs fuartecis;
marce tal paltan, peste l’argile,
cjape sù il stamp e fâs modons.
15 Però instès il fûc ti glotarà
e la spade ti fiscarà.
Ingrumiti come lis ruis,
ingrumiti come i zupets;
Strissinâts vie come i zupets
16a moltipliche i tiei marcjadants
plui che no lis stelis dal cîl,
17a lis tôs vuarnigjons come i zupets,
i tiei scrituriscj come i insets.
Si campin su lis muris te dì dal frêt.
Al jeve il soreli,
16b lis ruis a slargjin lis alis e a svolin vie,
17b a torseonin ca e là
e no si sa là ch’a son lâts. Disgraciâts!
18 Si sono forsit indurmidîts
i tiei pastôrs, re di Assur?
I tiei valorôs a son inçussîts,
il to popul al è dispierdût su pes monts
e no ’nd è nissun che lu tiri dongje.
19 No ’nd è rimiedi pe tô feride,
la tô plae no vuarìs plui.
Ducj chei ch’a vegnin a savêlu,
a son contents dal to distin.
Di fat sore di cui no isal passât
di un continui ce che tu stâs patint tu cumò?