BIBIE IN LINIE

Cjapitul 1

LA SAPIENCE REGULE DI VITE

Esortazion a la justissie

1 1 Amait la justissie, vualtris ch’o regeis la tiere,

pensait dal Signôr come cu va,

cirîlu cun tun cûr sclet,

2 parceche lui si fâs cjatâ di chei che no lu tìrin a siment,

e si palese a di chei che no son malfidents cun lui.

3 Difat i resonaments inturtiçâts a slontànin di Diu,

ma la fuarce ch’e pò dut, metude a lis provis,

e pare vie i basoâi.

4 La sapience no jentre tun’anime ch’e fâs il mâl

e nancje no stâ tun cuarp sotan dal pecjât.

5 Parceche il spirt sant ch’al insegne al odee l’imbroi,

si ten lontan dai resonaments cence dret

e al è sovât cuanche e rive la tristerie.

La sapience intal mont

6 La sapience e je un spirt che j ûl ben al om,

ma no lassarà cence cjastic chel ch’al blesteme cui siei discors,

parceche Diu al è testemoni dai siei pinsîrs,

vuardean sancîr dal so cûr,

e al scolte la sô peraule.

7 Il spirt dal Signôr al jemple dut il mont

e chel ch’al ten adun ogni robe al cognos la vôs di dut.

8 Par chest nol podarà restâ platât chel ch’al dîs robis che no van

e nancje no lu sparagnarà la justissie ch’e corêç.

9 Si implantarà un proces sui progjets dal trist

e il sunôr des sôs peraulis al rivarà fin li dal Signôr

a condane des sôs inicuitâz;

10 parceche une orele gjelose e scolte ogni robe

e il cisicâ di chei ch’a remènin nol reste platât.

11 Vuardaisi alore dal remenâ dibant,

tignît lontane la lenghe dal fevelâ mâl,

parceche nancje une peraule segrete no larà pierdude,

une bocje bausarie e cope l’anime.

La muart e je opare dal pecjât

12 Finîle di lâ a cirî la muart cui fai de vuestre vite

e di tirâsi intôr la ruvine cu lis voris des vuestris mans,

13 parceche Diu nol à fate la muart

e nol gjolt pe ruvine di chei ch’a vìvin.

14 Lui al à creadis dutis lis robis par ch’a sedin;

pe salût a son lis creaturis dal mont,

in lôr no ’nd’è velen di muart

e chel altri mont nol regne su la tiere.

15 Che difat la justissie no mûr mai.

16 Ma i triscj cui fats e cu lis peraulis a clàmin sore di lôr la muart;

crodinle amie, si son consumâts par jê

e cun jê e àn fat un pat

parceche a mèrtin di jessi framieç dai siei.

Notis:

  • 1,1-16 - In cheste “esortazion a la justissie”, l’autôr nus puarte al teme de prime part dal libri: l’om al è fat pe inmortalitât; la muart no je opare di Diu ni des creaturis, ma dal pecjât. Par podê jessi a part de vite di Diu, l’om al à di fuî il mâl e amâ la justissie, intindude come une colegance di pinsîr e di vore cu la volontât di Diu. Dome cussì la sapience e devente “regule di vite” e strade pe vite cence fin.
  • 1,4 - Il cuarp, par sè, nol è une robe brute. Però al pò deventâ un imprest dal pecjât e rivâ a paronâ su l’anime. Cheste afermazion che l’om al è fat di anime e di cuarp no je inte mentalitât bibliche, ch’e pense l’om come une unitât organiche, ma e je carateristiche dal pinsîr dai grêcs.
  • 1,7 - La sapience e dà vite a dut, e sa dut e a ten sù dut.
  • 1,13 - La muart no fâs part dal progjet di Diu, ch’al è un progjet di vite, ma e je jentrade intal mont par colpe dal pecjât.
  • 1,16 - Tai libris sapienziâi, il trist al è l’om cence sintiment, chel ch’al decît di distacâsi di Diu e de sô leç di vite. Fevelant dai triscj, il Fî di Sirac al dîs che in lôr si è distudade la vite, che la lôr vite e je piês che no la muart (Sir 22,10-13).
Cjapitui:

Chest sît al dopre dai cookie, continuant a navigâ tu acetis di doprâju. Plui informazions.

Questo sito utilizza i cookie per fornire la migliore esperienza di navigazione possibile. Continuando a utilizzare questo sito senza modificare le impostazioni dei cookie o cliccando su "Accetta" permetti il loro utilizzo.

Chiudi