BIBIE IN LINIE

Cjapitul 1

Titul

1 1 Sentence sul cont di Ninive. Libri de vision di Naum di Elcos.

Alef

La rabie dal Signôr

2a Il Signôr al è un Diu gjelôs

e une vore scjaldinôs.

Bet

3 Al ven indenant tal burlaç e te tampieste

e i nûi a son il pulvin dai siei pîts.

Ghimel

4 I cride al mâr e lu suie,

al fâs secjâ ducj i flums.

Dalet

Basan e il Carmêl si arsinissin

e dut il vert dal Liban s’inflapìs.

He

5 Lis monts a trimin denant di lui,

e lis culinis a clopin.

Vau

La tiere si dislît denant di lui,

il mont e dute la sô int.

Zain

6 Cuant che al è inrabiât, cui podaressial tignîi teste?

Cui podaressial resisti a la sô rabie infogade?

Het

La sô rabie e svampe tant che il fûc

e lis cretis si sfruçonin denant di lui.

Tet

7 Il Signôr al è bon cun chel ch’al sta fidât sun lui,

une fuartece par chel ch’al è sidiât.

Jod

Il Signôr al cognòs chel che si pare li di lui

8 e cuant che e rive la montane, ju salve.

Caf

Al fruce chel che si met cuintri di lui,

ur cor daûr ai siei nemîs ancje tal scûr.

Lamed

9b No si metaran dôs voltis cuintri i siei nemîs,

10a ma a saran fruçâts di fonde fûr.

Mem

Menacis cuintri di Ninive

9a Ce trainis inmaneaiso cuintri dal Signôr?

Lui lis fasarà lâ in strucj.

Nun

2b Il Signôr si svindiche dai siei nemîs,

s’infoghe cuintri dai siei contraris.

Samec

10b A saran svinidrîts tant che baraçs,

a saran ardûts dal dut, tant che stranc sut.

(Pe)

11a Di te al è saltât fûr chel ch’al masane

progjets di tristerie cuintri dal Signôr.

Ain

13 Cumò o fruçarai il so jôf che tu âs intor

e o crevarai lis tôs cjadenis.

Zade

14 Il Signôr al fâs sul to cont cheste sentence,

11b om che tu masanis tristeriis:

Qof

14b O jemplarai di vergogne il to tombâl,

parcè che tu sês maludît.

Sin

Il to non no lu ricuardaran mai altri

e di te no saltarà fûr plui nissune gjernazie.

Tau

Lis statuis sculpidis e fondudis a saran tiradis vie

dal templi dai tiei dius.

Notis:

  • 1,1 - Il non dal profete (ch’al vûl di “il consolât”) nol è dai plui doprâts inte Bibie. Plui dificil rivâ a cjatâ fûr il so paîs, Elcos.
  • 1,2 - Il teme de gjelosie e de rabie dal Signôr al è consuet intai profetis, soredut in Gjeremie.
  • 1,3-6 - Chescj paragons dal burlaç, dal sut, dal taramot e dal folc a son la suage tipiche pes manifestazions dal Signôr o teofaniis (Es 19,16-18; Dt 5,21s; Ab 3,3-15 e v.i.).
  • 1,12 - Nol è metût parcè che nol è culì il so puest origjinâl.
Cjapitui: