Seconde part: Sezion profetiche
lis robis chE a capitaran
La cort dal cîl
4 1 Podopo mi capità une vision. Une puarte e jere spalancade tal cîl. La vôs ch’o vevi sintude prin a fevelâ tant che une trombe mi diseve: Monte sù ca sù; ti fasarai viodi lis robis ch’a varan di capitâ plui indenant. 2 A bot e sclop mi cjatai brincât dal Spirt. E ve là sù, tal cîl, une sente, e su la sente al jere sentât un. 3 Chel ch’al jere sentât al semeave, cjalantlu, di jasp e di aghite rosse. Tal cîl, un arc precîs dal smeralt al contornave la sente. 4 Di ca e di là de sente a jerin vincjecuatri scagns e sui scagns a stavin sentâts vincjecuatri viei vuluçâts di blanc cun siet zois d’aur sul cjâf. 5 De sente a vignivin fûr lamps, vôs e tons; denant de sente a jerin impiâts siet lusôrs, ch’a rapresentavin i siet spirts di Diu. 6 Denant de sente al jere come un mâr stralusint, usance il cristal. Tal mieç de sente e di ca e di là de sente a jerin cuatri nemâi cjamâts di vôi par denant e par daûr. 7 Il prin nemâl al jere a uso un leon, il secont nemâl al semeave un vidiel, il tierç nemâl al veve la filusumie di om, il cuart nemâl al jere sul stamp di un’acuile cuant ch’e svole. 8 I cuatri nemâi a àn sîs alis parom, torator e dentri vie a son fodrâts di vôi, dì e gnot no sostin di dî:
Sant, sant, sant
il Signôr Diu, paron di dut,
Chel ch’al jere, al è e al sta rivant.
9 E ogni volte che chescj nemâi i davin glorie e onôr e ringraciament a di chel ch’al è sentât su la sente e al vîf tai secui dai secui, 10 i vincjecuatri viei si butavin in genoglon denant di chel ch’al è sentât su la sente e a laudavin chel ch’al vîf tai secui dai secui e a butavin lis lôr zois denant de sente, disint:
11 “Signôr e Diu nestri, tu mertis propit
di vê la glorie, l’onôr e il comant,
parcè che tu âs fatis dutis lis robis,
e par volontât tô
a son stadis creadis e a stan sù”.