BIBIE IN LINIE

Cjapitul 4

GJENEALOGJIE DI ADAM A DAVID

Fruçons gjenealogjics di Gjude

4 1 Fîs di Gjude: Perez, Chezron, Carmi, Cur e Sobal. 2 Reaie, fi di Sobal, al à vût Jacat; Jacat al à vût Acumai e Laad. Chestis a son lis gjernaziis dai zoreateus.

3 Chescj a jerin i fîs dal pari di Etam: Izreel, Isme e Ibdas; lôr sûr e veve non Azlelponi. 4 Penuel al jere pari di Ghedor; Ezer al jere pari di Cuse. Chescj a jerin i fîs di Cur, prin fi di Efrate, pari di Betlem.

5 Ascur, pari di Tekoe, al veve dôs feminis, Chelee e Naare. 6 Naare i parturì Acuzam, Chefer, il temanit e l’acastarit; chescj a jerin fîs di Naare. 7 Fîs di Chelee: Zeret, Zocar, Etnan e Koz.

8 Koz al à vût Anub, Azozebe e lis gjernaziis di Acarche, fi di Arum. 9 Jabez al jere plui cognossût che no siei fradis; sô mari i veve metût non Jabez parcè che e diseve: “Jo lu ài parturît cul dolôr”. 10 Jabez al preà il Diu di Israel disint: “Se tu mi benedisessis e tu slargjassis i miei confins e la tô man e fos simpri cun me e tu mi tignissis vuardât des disgraciis, sigûr che no penarès!”. E Diu lu scoltà in ce ch’al veve domandât.

11 Chelub, fradi di Suche, al à vût Mechir, pari di Eston. 12 Eston al à vût Bet-Rafe, Paseac e Techine, pari di Ir-Nacas. Chescj a son i oms di Reche.

13 Fîs di Kenaz: Otniel e Seraià; fîs di Otniel: Catat e Meonotai. 14 Meonotai al à vût Ofre; Seraià al à vût Joab, pari de concje dai artesans, parcè che a jerin ducj artesans.

Fruçons gjenealogjics di Caleb

15 Fîs di Caleb, fi di Jefune: Ir, Ele e Naam. Fîs di Ele: Kenaz.

16 Fîs di Jealelel: Zif, Zife, Tirie e Asarel. 17 Fîs di Ezre: Jeter, Mered, Efer e Jalon. E parturì Miriam, Samai e Isbac, pari di Estemoe. 18 La sô femine, la gjudee, e parturì Jeter pari di Ghedor, Cheber pari di Soco e Jekutiel pari di Zanoac. Chescj a son invezit i fîs di Bitie, fie dal faraon, che Mered le veve sposade.

19 Fîs de femine Odaie, sûr di Nacam, a jerin il pari di Keile il garmit e di Estemoe il maacateu. 20 Fîs di Simon: Amon, Rine, Ben-Canan e Tilon. Fîs di Isei: Zochet e Ben-Zochet.

21 Fîs di Sele, fi di Gjude: Er pari di Leche, Laade pari di Marese e lis gjernaziis di chei ch’a lavoravin il fil di lin a Bet-Asbee, 22 Jokim e la int di Cozebe, Joas e Saraf, che a paronarin in Moab e po a tornarin a Betlem. Ma si trate di robis sucedudis par vieri. 23 A fasevin creps e a jerin a stâ a Netaim e a Ghedere; ventilà a jerin a stâ cul re, sot di lui.

Dissendents di Simeon

24 Fîs di Simeon: Nemuel, Jamin, Jarib, Zerac, Saul, 25 so fi Salum, so fi Mibsam, so fi Misme. 26 Fîs di Misme: Camuel, so fi Zacur, so fi Simei. 27 Simei al à vût sedis fîs e sîs fiis, ma i siei fradis a àn vûts pôcs fruts; lis lôr gjernaziis no si slargjarin come chês dai dissendents di Gjude. 28 Si sistemarin in Bersabee, in Molade, in Cazar-Sual, 29 in Bile, in Ezem, in Tolad, 30 in Betuel, in Corme, in Ziklag, 31 in Bet-Marcabot, in Cazar-Susim, in Bet-Birei e in Saaraim. Chestis a jerin lis lôr citâts fint al ream di David. 32 I lôr borcs a jerin Etam, Ain, Rimon, Tochen e Asan: cinc citâts 33 e ducj i borcs dai contors fint a Baal. Si jerin implantâts ventijù e chestis lis listis dai lôr vons.

34 Mesobab, Jamlec, Jose fi di Amasie, 35 Gjoel, Jeu fi di Josibie, fi di Seraià, fi di Asiel, 36 Elioenai, Jaakobe, Jesocaie, Asaie, Adiel, Jesimiel, Benaià, 37 Zize fi di Sifei, fi di Alon, fi di Jedaià, fi di Simri, fi di Semaià. 38 Chescj ch’a son ripuartâts a jerin sorestants tes lôr tribûs e lis lôr gjernaziis si slargjarin un disordin. 39 A lerin viers de jentrade di Ghedor fint a soreli jevât de valade, a cirî passons pai lôr nemâi. 40 S’intivarin in passons bondants e bogns: il puest al jere larc, cuiet e in pâs. Prin di lôr a jerin a stâ i dissendents di Cam. 41 Ma i oms ch’a son stâts ripuartâts i nons, sot di Ezechie re di Gjude a plombarin su lis tendis di Cam e dai meunits, ch’a jerin sistemâts aventi, e ju fruçarin; ju avodarin al svinidriment, ch’al à durât fint in dì di vuê, e a àn cjapade la lôr place, parcè che il puest al jere plen di passons pai nemâi.

42 Un pôcs di lôr, jenfri i dissendents di Simeon, si sistemarin su lis monts di Seir: cinccent oms, sot il comant di Pelatie, Nearie, Refaie e Uziel, fîs di Isei. 43 A fruçarin ce ch’al jere vanzât di Amalec e si implantarin ventijù fint in dì di vuê.

Notis:

  • 4,1 - Il cjapitul al ripuarte zontis di gjenealogjiis des grandis fameis de tribù di Gjude e di altris gjernaziis incorporadis te grande famee di David. La peraule “fîs” e sta par “dissendents”.
  • 4,9 - Pai antîcs il non al palesave il distin di chel che lu puartave. Un non imponût de mari al jere segnâl di sfurtune.
  • 4,10 - Jabes nol gambie non, come ch’a jerin in consuet, ma al ricor a Diu cu la preiere; tant a dî che la preiere scoltade di Diu e po gambiâ il distin de vite.
  • 4,11 - E je ripuartade la dissendence di Chelub, la gjernazie ch’e veve stalaç tal teritori di Gjude. Lis versions antighis a cjapin Chelub par Caleb.
  • 4,17 - Miriam: non ebraic maschîl o riferiment a la sûr di Mosè (Es 15,20).
  • 4,24 - La piçule tribù di Simeon, sistemade te part meridionâl de tiere, e à vude simpri grande colegance cu la tribù di Gjude e tal ultin e je stade cjapade dentri dal dut. Sore de pierdude autonomie e à vût l’onôr di jessi simpri censide subit dopo di Gjude.
  • 4,34 - A vegnin ricuardâts tredis sorestants di tribûs par vie de lôr grande innomine.
  • 4,40 - I dissendents di Cam a jerin i cananeus, considerâts camits, ven a stâi egjizians. A jerin int pacjifiche.
Cjapitui: