BIBIE IN LINIE

Vanseli di Matieu

Introduzion

Cjapitul 4

il vanzeli de INFANZIE

Lis tentazions

4 1 Alore Gjesù al fo menât dal Spirt intal desert par jessi tentât dal diaul. 2 E, dopo di vê zunât par corante dîs e corante gnots, i vignì fan. 3 I lè dongje il tentadôr e i disè: “Se tu sês Fi di Diu, dîs che chestis pieris a deventin pan”. 4 Ma lui i rispuindè: “Al è scrit:

L’om nol vivarà dome di pan,

ma di ogni peraule ch’e ven fûr de bocje di Diu”.

5 Alore il diaul lu menà cun sè te citât sante, lu poià su la spice dal templi 6 e i disè: “Se tu sês Fi di Diu, butiti jù. Di fat al è scrit:

Par te ur darà ordin ai siei agnui

che ti tegnin sù cui lôr braçs,

par che il to pît nol sbati in cualchi clap”.

7 I rispuindè Gjesù: “Al è ancje scrit:

No sta tentâ il Signôr to Diu”.

8 Di gnûf il diaul lu menà cun sè suntune mont une vore alte e i mostrà ducj i reams dal mont cun dut il lôr sflandôr. 9 E i disè: “Dutis chestis robis tes darai a ti se, butanti in genoglon, tu mi adorarâs”. 10 Alore Gjesù i disè: “Va vie di chi, satane! Al è scrit:

Tu adorarâs il Signôr to Diu

e tu ti ingenoglarâs dome denant di lui”.

11 Alore il diaul lu lassà. E ve che i agnui i lerin dongje par servîlu.

Inizi de predicazion in Galilee

12 Cuant che al vignì a savê che Zuan al jere stât metût in preson, Gjesù si ritirà in Galilee; 13 e, lassât Nazaret, al lè a stâ a Cafarnao, ch’al è su la rive dal mâr, tal teritori di Zabulon e di Neftali, 14 par che si colmàs ce ch’al veve nunziât il profete Isaie là ch’al dîs:

15 La tiere di Zabulon e la tiere di Neftali,

su la strade dal mâr, di là dal Gjordan, Galilee dai forescj;

16 il popul sentât tal scûr

al à viodude une grande lûs,

par chei ch’a son a stâ te regjon scure de muart

une lûs si è impiade.

17 D’in chê volte Gjesù al scomençà a predicjâ disint: “Convertîtsi, parcè che al è dongje il ream dai cîi”.

Mc 1,16-20; Lc 5,1-11

I prins dissepui

18 Cjaminant ad ôr dal mâr di Galilee, Gjesù al viodè doi fradis, Simon clamât Pieri e Andree so fradi: a jerin daûr a butâ lis rêts tal mâr; di fat a jerin pescjadôrs.

19 Ur disè: “Vignît daûr di me e us fasarai pescjadôrs di oms”. 20 E lôr dal moment, bandonadis lis rêts, i son lâts daûrji. 21 Lant vie di li, al viodè altris doi fradis, Jacum di Zebedeu e Zuan so fradi: a jerin daûr a comedâ lis rêts su la barcje insieme cun lôr pari Zebedeu. Ju clamà 22 e lôr dal moment, bandonade la barcje cul pari, i son lâts daûrji.

Mc 1,39; 3,7-8; Lc 4,14-15.44

Lis primis oparis

23 Passant par dute la Galilee, Gjesù al insegnave intes lôr sinagoghis nunziant il vanzeli dal ream e vuarint tal popul ogni sorte di malatie e infermitât. 24 La sô innomine si slargjà par dute la Sirie e cussì i menarin dongje ogni sorte di malâts: int ch’e jere lambicade di infermitâts e di tancj dolôrs, indemoneâts e paralitics; e lui ju vuarì. 25 E cussì i lerin daûrji grandis folis di int rivadis dongje de Galilee, de Decapoli, di Gjerusalem, de Gjudee e de Transgjordanie.

Lc 6,20-23

Notis:

  • 4,1 - Culì Gjesù al ven presentât in dute la sô umanitât e, come ducj, al scuen frontâ la prove o tentazion. Lis tentazions di Crist no vegnin par vie di passions disordenadis, ma par vie dal diaul.
  • 4,4 - Dt 8,3.
  • 4,6 - Sal 9,11-12.
  • 4,7 - Dt 6,16.
  • 4,10 - Dt 6,13.
  • 4,11 - Bisugnarès savê se il diaul i à comparît par difûr, come che si viôt tes rafigurazions artistichis, o se invezit si trate dome di pinsîrs. Ma plui impuartant al è rifleti sul moment des tentazions, vadì cuant che al stave par scomençâ. Crist al sielç di no fondâ il so ream sui bêçs, sul consens de int, su la fuarce politiche.
  • 4,13 - Crist al scomence la vite publiche a pene che Zuan al ven metût in preson, par dî che Diu nol lasse il popul cence profetis. Cafarnao, ad ôr dal lât o mâr di Tiberiade, il paîs di Pieri, al devente ancje il paîs di Crist.
  • 4,15 - Is 8,23; 9,1. La Galilee e ven clamade “dai forescj” par vie de sô popolazion miscliçade di ebreus e paians e ancje crosere pes grandis stradis di comunicazion (la “strade dal mâr” o Via maris).
Cjapitui: