DELITS E CJASTICS DI ISRAEL
Coruzion gjenerâl
4 1 Scoltait la peraule dal Signôr,
fîs di Israel,
parcè che il Signôr al è in cuistions
cu la int de tiere.
No ’nd è scletece, no ’nd è afiet,
no ’nd è sience di Diu inte tiere;
2 ma il zurament fals e la bausie,
il copament e la robarie
e l’adulteri a cjapin simpri plui pît,
si mace e si incrose sanc cun sanc.
3 Par chel la tiere e je bandonade
e dute la int e va denantdaûr,
parfin lis bestiis dai cjamps
e i ucei dal cîl;
ancje i pes dal mâr a van scomparint.
La coruzion dai predis
4 Però nissun nol incolpi,
nissun nol fasi justizie.
O soi in cuistions cun te, predi!
5 Tu tu clopis di dì,
al clope ancje il profete
insieme cun te vie pe gnot;
tu tu ruvinis tô mari,
6 il gno popul al va in ruvine
parcè che i mancje la sience.
Za che no tu vuelis savênt de sience
jo no vuei savênt di te come predi;
tu tu âs butade di bande la leç dal to Diu
e ancje jo o butarai di bande i tiei fîs.
7 Ducj a àn pecjât cuintri di me,
a àn gambiade la lôr glorie cul disonôr.
8 Si passin cul pecjât dal gno popul
e a son golôs de sô colpe.
9 Ce ch’al sarà dal popul al sarà ancje dal predi:
lu cjastiarai pe sô condote
e o fasarai plombâ sore di lui lis sôs voris.
10 A mangjaran ma cence rivâ a passisi;
si prostituissaran ma cence rivâ a vê fruts,
parcè che a àn butât di bande il Signôr
par dâsi a la prostituzion,
11 al vin e al most, ch’a fasin pierdi il cjâf.
Cuintri de idolatrie cultuâl
12 Il gno popul al interpele il so len
e la sô mace i dà la rispueste;
parcè che un spirt di prostituzion lu fâs straviâ
e si prostituissin butant di bande il lôr Diu.
13 Su lis spicis des monts a ufrissin sacrificis
e sui çucs a brusin lis ufiertis,
sot dal rôl e dal pôl
e dal terebint, ch’al à chê ombrene cussì biele.
Se si prostituissin lis vuestris fiis
e lis vuestris brûts a fasin adulteri,
14 no cjastiarai lis vuestris fiis parcè che si prostituissin
e nancje lis vuestris brûts parcè che a fasin adulteri;
parcè che ancje lôr a van intun cjanton cu lis pelandis,
e cu lis sdrondinis dal diu a ufrissin sacrificis.
Un popul, se nol à sintiment, al va in ruvine.
Racomandazion a Gjude par che nol fasi come Israel
15 Se tu tu ti prostituissis, Israel,
nol à di lâ fûr di strade Gjude.
No stait a lâ a Galgale,
no stait a lâ sù a Bet-Aven,
no stait a zurâ pe vite dal Signôr.
Israel al è une mange che no si lasse domâ
16 Propit! Come une mange morbinose
Israel al fâs matetâts.
Podaraial il Signôr fâju passonâ
come un agnel lassât a slas?
17 Efraim si è butât cui idui,
18 si distire insieme cui cjochelis;
si prostituissin tune maniere di fâ ingomut,
a la lôr glorie a preferissin la vergogne.
19 L’aiar ju invuluçarà cu lis sôs alis
e si vergognaran dai lôr altârs.