LA CONCUISTE DE TIERE IMPROMETUDE
Passaç dal Gjordan
3 1 Gjosuè al jessì denant dì e al partì di Sitim cun dute la trope dai israelits. A lerin indenant fint al Gjordan e li a passarin la gnot prime di lâ di là. 2 Dopo trê dîs, i sorestants a passarin il campament fûr par fûr 3 e i derin al popul chest ordin: “Cuant che o viodarês l’arcje dal pat dal Signôr vuestri Diu e i predis levits che le puartin, o bandonarês il lûc là che o sês cumò e i larês daûrji 4b par savê ce bande lâ, par vie che no vês mai fate chê strade. 4a Ma però tra vualtris e l’arcje o vês di vê une distance di un doimil comedons: no stait a lâi daprûf!”. 5 Gjosuè i disè al popul: “Smondeaitsi, che doman il Signôr al fasarà robonis framieç di vualtris!”. 6 Daspò Gjosuè ur disè ai predis: “Cjolêt sù l’arcje dal pat e metêtsi denant de int”. E lôr a cjolerin l’arcje dal pat e a lerin a metisi in teste dal popul.
7 Il Signôr i disè a Gjosuè: “O scomençarai propit vuê a fâti grant in face di dut Israel, par che a sepin che jo o soi cun te come che o ài stât cun Mosè. 8 Tu ur darâs chest ordin ai predis che a puartin l’arcje dal pat: Cuant che o sarês rivâts ad ôr da l’aghe dal Gjordan, o vês di fermâsi tal Gjordan”. 9 Alore Gjosuè ur disè ai israelits: “Vignît chi e scoltait ce che al dîs il Signôr vuestri Diu”. 10 E Gjosuè al zontà: “Cussì o savarês che il Diu vîf al è framieç di vualtris e che al fasarà fûr di sigûr denant di vualtris i cananeus, i itits, i eveus. i perissits, i gjergjeseus, i amoreus e i gjebuseus. 11 Ve: l’arcje dal pat dal Signôr di dute la tiere e sta par passâ denant di vualtris tal Gjordan. 12 Sielgêt daurman dodis oms framieç des tribûs di Israel, un par tribù. 13 A pene che i predis che a puartin l’arcje dal Signôr, Signôr di dut il mont, a varan poiât il lôr pît tes aghis dal Gjordan, lis aghis dal Gjordan si dividaran: chês che a scorin jù des monts si fermaran come ingrumadis”.
14 Cuant che la trope e lassà lis tendis par passâ il Gjordan, i predis a puartarin l’arcje dal pat denant di dute la int. 15 A pene che chei che a puartavin l’arcje a forin rivâts tal Gjordan e che i pîts dai predis che a puartavin l’arcje a tocjarin lis aghis – si sa che il Gjordan sul seselâ il forment al cor ad implen di une rive in chê altre –, 16 lis aghis disore si fermarin e a faserin come un grum une vore plui a mont, a Adame, la citât in bande di Zartan, biel che lis aghis che a corevin viers il mâr de Arabe, il mâr Salât, a jerin dividudis dal dut. Il popul al passà di là juste in face di Gjeric. 17 I predis che a puartavin l’arcje dal pat dal Signôr si fermarin tal sut, tal mieç dal Gjordan, intant che dute la trope di Israel e passave di là cence bagnâsi, fintremai che dut il popul nol finì di passâ di là dal Gjordan.