I PRECEDENTS DE LOTE
La batae di Emaus
4 1 Alore Gorgje al cjolè daûrsi cincmil oms e mil cjavai sielts e al gjavà il campament vie pe gnot 2 par plombâ sul campament dai gjudeus e par fruçâju cuant che no se spietavin. I oms de Acre i segnavin la strade. 3 Ma Gjude al vignì a savêlu e ancje lui al partì cui siei vuerîrs par frontâ lis fuarcis dal re ch’a jerin in Emaus, 4 intant che chês altris schiriis a jerin ancjemò sparniçadis e lontanis dal campament. 5 Gorgje al rivà tal campament di Gjude in plene gnot e nol cjatà nissun. Alore si metè a cirîju su pes monts disint: “Chei chi a stan scjampant”. 6 Invezit Gjude, a pene ch’al fasè dì, al comparì tal plan cun trê mil oms; no vevin però ni coracis ni spadis, come ch’a varessin bramât. 7 A vioderin che il campament dai forescj al jere ben difindût e rinfuarçât, cu la cjavalarie che lu cerclave e dute int di mistîr par cont di vuere. 8 Ma Gjude ur disè ai siei oms: “No stait a vê pôre se a son in tancj e nancje a spaventâsi dal lôr impit; 9 visaitsi cemût che i nestris vons a son stâts salvâts tal mâr Ros propit juste cuant che il faraon ur coreve daûr cul esercit. 10 Alcìn la nestre vôs viers dal Cîl, par ch’al palesi cun nô il so bonvolê, che si visi dal pat fat cui nestris vons e ch’al fruci vuê chestis schiriis ch’o vin denant di nô. 11 Cussì ducj i popui a tignaran a ments ch’and è un ch’al sfrancje e al salve Israel”. 12 I stranîrs a alçarin i vôi e a vioderin che chei altris a vignivin indenant; 13 alore a saltarin fûr dai campaments par combati. I oms di Gjude a sunarin lis trombis 14 e a tacarin. I forescj a forin batûts e a scjamparin viers il plan, 15 ma chei ch’a jerin plui indaûr a colarin sot de spade. Ur corerin daûr fint a Ghezer e fin tes tavielis de Idumee e di Asdod e di Jamnie; ant forin copâts un tremil di lôr. 16 Cuant che Gjude e i siei oms a tornarin indaûr, 17 i disè a la sô int: “No stait a vê tante brame di rafâ dut, parcè che o vin ancjemò tant ce combati. Gorgje e i siei oms a son su la mont dongje di nô. 18 Par chel tignîtsi pronts a frontâ il nemì e a combatilu; plui in là o rafarês cun comut dute la robe”. 19 Nol veve nancje finît di dî, ch’e comparì une schirie ch’e vignive jù de mont. 20 Di fat a vevin viodût che i lôr a jerin stâts batûts e che chei altris i davin fûc al campament: il fum che si vedeve al palesave ce ch’al stave sucedint. 21 Viodint une tâl, si spirtarin a muart. E cuant che a cjalarin jù tal plan e a vioderin lis schiriis di Gjude prontis par tacâ, 22 a scjamparin ducj te tiere dai filisteus. 23 Alore Gjude al tornà a rafâ il campament e a ingrumarin un stragjo di aur e di arint e di pieçamente intenzude di purpure viole e di purpure colôr dal mâr e tante altre robe di valôr. 24 Tal tornâ indaûr a cjantavin e a benedivin il Cîl “ parcè che al è bon e il so boncûr al è par simpri ”. 25 Chê e fo une zornade di grande liberazion par Israel.
Prime campagne di Lisie
26 I stranîrs che le vevin scapolade si presentarin di Lisie e i contarin dut e ch’al jere sucedût. 27 Sintint une tâl, lu cjapà un grant aviliment e une grande pôre, parcè che lis robis in Israel no jerin ladis come ch’al voleve lui e l’esit nol jere stât come ch’al veve ordenat il re.
28 Alore l’an dopo al metè adun sessante mil oms di prime e cinc mil cjavai par combati cuintri di lôr. 29 A rivarin te Idumee e si camparin in Bet-Zur. Gjude ju frontà cun dîs mil oms. 30 Cuant che al viodè chê sorte di campament, al fasè cheste preiere: “Sêstu benedet, salvadôr di Israel, tu che tu âs indebulît l’impit dal potent midiant dal to famei David e che tu âs fat colâ l’esercit dai stranîrs tes mans di Gjonate, fi di Saul, e dal so scudîr. 31 Fâs colà compagn ancje cumò chest esercit tes mans di Israel to popul e fâs colâ il disonôr sul lôr esercit e su la lôr cjavalarie. 32 Jempliju di pôre e creve la rogance de lôr fuarce, ch’a sedin fiscâts te lôr ruvine. 33 Butiju abàs cu la spade di chei che ti vuelin ben; che ti laudin cun cjants ducj chei ch’a cognossin il to non”. 34 Po si butarin un cuintri di chel altri, tant di une bande che di chê altre, e a colarin denant dai gjudeus un cinc mil oms dal campament di Lisie. 35 Viodint che lis sôs schiriis a stavin lant in sfas, biel che a lis schiriis di Gjude ur cresseve la vigorie, e ch’a jerin pronts a vivi o a murî cun onôr, Lisie al tornà in Antiochie, là ch’al tirà dongje, a paiament, ancjemò plui stranîrs par tornâ di gnûf in Gjudee.
Purificazion e dedicazion dal templi
36 Intant Gjude e i siei fradis a diserin: “Ve che i nestris nemîs a son stâts batûts; anìn a smondeâ il santuari e a tornâlu a consacrâ”. 37 Cussì si dè dongje dut l’esercit e a lerin sù su la mont di Sion. 38 A cjatarin il santuari bandonât, l’altar profanât, lis puartis arsinidis e lis jerbis cressudis tai curtîi come tun lûc pustot o di mont, e i apartaments sants tune desolazion. 39 Alore si sbregarin i vistîts, a tacarin a craçâ, si jemplarin il cjâf di cinise, 40 si butarin cu la muse par tiere, a faserin dâ segnâi cu lis trombis e a berlarin viers il Cîl. 41 Gjude ur ordenà ai siei oms di tignî impegnâts chei de Acre, fin che nol ves smondeât il santuari. 42 Po al sielgè predis cence pecjis, rispietôs de leç, 43 e lôr a smondearin il santuari e a puartarin lis pieris profanadis tun lûc soç. 44 A faserin consei par viodi ce che si podeve fâ a rivuart dal altâr dai olocauscj, ch’al jere stât profanât. 45 Ur vignì la buine idee di sdrumâlu, par che nol restàs li di vergogne, sint stât profanât dai forescj. A sdrumarin duncje l’altâr 46 e a meterin lis pieris su la mont dal templi, tun lûc adat, fin che nol fos rivât un profete a dîur alc in merit. 47 Po a cjolerin pieris no lavoradis, come ch’e dîs la leç, e a faserin sù un gnûf altâr sul stamp di chel di prin. 48 A comedarin il santuari e a consacrarin l’interni dal templi e i curtîi. 49 A tornarin a fâ i furniments sacrâi e a puartarin dentri tal templi il cjandelîr, l’altâr dai bonodôrs e la taule. 50 Po a brusarin incens sul altâr e a impiarin sul cjandelîr lis lampadis, ch’a faserin lûs tal templi. 51 A meterin ancje i pans su la taule e a slargjarin lis tendinis. Cussì a finirin la vore ch’a vevin scomençât. 52 Si derin dongje a buinore dai vincjecinc dal nono mês, ven a stâi tal mês di Casleu, tal an cent e corantevot, 53 e a ufririn il sacrifici seont la leç sul altâr dai olocauscj, che lu vevin fat gnûf. 54 Te stesse stagjon e te stesse dì che i forescj lu vevin profanât, al fo tornât a consacrâ, framieç di cjants, di suns di citaris, di arpis e di covertoriis. 55 Dut il popul si butà cu la muse par tiere, a adorarin e a benedirin il Cîl, ch’al jere stât bon cun lôr. 56 A faserin la dedicazion dal altâr par vot dîs e a ufririn olocauscj cun gjonde e a sacrificarin vitimis di ringraciament e di laut. 57 Po a furnirin la façade dal templi cun zois di aur e cun piçui scûts. A tornarin a fâ i puartons e lis cjamaris e a meterin lis puartis. 58 Une vore grande e fo la gjonde framieç dal popul, parcè che e jere stade parade jù la vergogne dai forescj. 59 Podopo Gjude e i siei fradis e dute la semblee di Israel a stabilirin di fâ fieste tai dîs ch’e scjadeve la dedicazion dal altâr, ogni an, par vot dîs, scomençant dai vincjecinc dal mês di Casleu, cun gjonde e cun ligrie. 60 A faserin sù in chê volte, ator de mont di Sion, mûrs alts e toressis ch’a tignivin, par no che i forescj a tornassin a folpeâlu come ch’a vevin fat la prime volte. 61 Al metè un trop di soldâts par fâi la vuaite e al rinfuarçà Bet-Zur, par che il popul al ves une difese cuintri de Idumee.